Атыраудағы балабақша директоры балаларға дұрыс тамақ бермегені үшін айыппұл төлейді

ERNUR.KZ. Ақтауда сот балаларды дұрыс тамақтандырмаған «Айналайын» жекеменшік балабақшасының директорын жауапқа тартты, деп жазады ҚазАқпарат.

Балабақша тәрбиеленушілерінің ата-анасы - жалпы 22 адам кәсіпкерді жауапқа тартуды талап етіп сотқа жүгінген. Ақтау қалалық №2 соты істі тексеріп шыққан соң, олардың талабын ішінара қанағаттандырды. Соттың үкімімен кәсіпкер әр баланың ата-анасына моральдық залалдың орнын толтыру үшін 10 446 теңгеден айыппұл төлейтін болды.

Ата-аналардың шағымдануына қарағанда, балабақшада дұрыс тамақтанбағандықтан, балалардың қарны тоймай, жиі ауыра бастаған.

«Ата-аналар бұлтартпас нақты дәлелдер келтірген жоқ. Әкімдіктен тексеріс жүргізілмеген, прокуратура немесе санэпидемстанциядан растама алынған жоқ. Ата-аналардың айтуынша, балабақшада соңғы аптада аспаз алмасқан соң балалардың қарны тоймайтын болған. Біз осы дәлелді ескердік», - деп мәлімдеді Ақтау №2 сотының судьясы Ақсая Еңсебаева.

фото: lada.kz

Ата-аналардың айтуынша, балабақша жабылып қалғандықтан тексеріс жүргізілмеген.