Атыраулық оқушылар халықаралық жарыста топ жарды

22.12.2020 11:54

1 523

Халықаралық жарысқа 35 елден 752 үміткер қатысқан.

Бразилияның Ново-Гамбург қаласында «MOSTRATEC» атты 35–ші Халықаралық білім көрмесінің аясында өткен ғылыми жобада атыраулық оқушылар жүлделі орынға ие болды,деп хабарлайды ERNUR.KZ Атырау облыстық білім беру басқармасының баспасөз қызметіне сілтеме жасап.

Идеялар мен терең зерттеу жұмыстарының басын қосқан додаға 35 елдің 752 үміткері қатысты. Олардың қатарында Қазақстан мектептерінен 25 оқушы бар. Соның ішінде Атырау облысы дарынды балаларға арналған мамандандырылған мектеп-лицей-интернатының екі оқушысы топ жарып, жеңімпаздар қатарынан көрінді.

Атап айтқанда, 11 сынып оқушылары Ақбота Жұбатқан математика пәнінен І орынды иеленсе, Айданур Демирджи тарих пәнінен ІІІ орын алды.

Ақбота Жұбатқанның айтуынша, олар өз жобаларын ағылшын тілінде қорғаған.

- Жаздың аяқталуына он шақты күн қалған кезде менің сынып жетекшім “Mostratec” атты халықаралық ғылыми жобалар жарысы болатынын хабарлаған болатын. Міне, сол күннен бастап мен дайындала бастадым.
Пандемияға байланысты қашықтан өткізілгеніне қарамастан сайыс өте қызықты және тәжірибеге толы болды. Байқау «Jitsi meet» атты видео конференцияларға арналған мобилді қосымшаның көмегімен өтті. Мен үшін бұл дода ұмытылмастай болды, көп тәжірибе алдым, - дейді ол.

Айта кетейік, жеңімпаздарды жобаға қыздар лицейінің бейінді оқу ісінің меңгерушісі Оксюз Рахман мен Атырау университетінің мұғалімі, математика пәнінің кандитаты Аққабыл Абиров дайындаған.