​Қазақстанда мерзімі өтіп кеткен дәрі-дәрмек сатпақ болғандарға 5,5 млн теңге айыппұл салынған

ДДСҰ деректері бойынша сатылатын дәрілік заттардың 10% шамасы контрафактылы болып табылады. Контрафактылы өнімді тұтыну жыл сайын 100 мыңнан 1 миллионға дейінгі адамның өліміне себеп болып отыр,-деп хабарлайды ERNUR.KZ.

Қазақстанда фальсификацияланған өнімді анықтау деректері туралы ресми ақпарат жоқ, алайда медициналық өнім айналымы саласындағы бұзушылықтар өзекті мәселе болып табылады.

2017 жылы тексерулер барысында Қазақтандағы дәрі-дәрмек айналымы саласында 507 әкімшілік құқық бұзушылық анықталды. Тіркелмеген және қолдан жасалған дәрілік заттарды, сондай-ақ жарамдылық мерзімі өтіп кеткен дәрілік заттарды өткізу жағдайлары анықталды, салынған айыппұлдардың жалпы сомасы 5,5 млн теңгені құрады.

Елімізде заңсыз және сапасыз медициналық заттардың айналымын болдырмау мақсатында медициналық өнімді қадағалау жүйесін құру және енгізу бойынша жұмыстар жүргізіліп жатыр.

ДЗСҰО Бас директорының орынбасары Болат айтуынша, республикада медициналық өнімді қадағалау жүйесін енгізу қазақстандықтарды сапалы және қауіпсіз медициналық өніммен – дәрілермен және медициналық бұйымдармен – (шприцтер, медициналық қолғаптар, инелер, сынауықтар және т.б.) қамтамасыз етуге мониторинг орнату және бақылау мүмкіндігін береді. Осындай жүйе ел аумағындағы өндіріс немесе елге импорттау сатысынан дәріханалар арқылы тұтынушыларға өткізу сәтіне дейінгі немесе денсаулық сақтау ұйымына келіп түсуге дейінгі медициналық өнімді қадағалаудың тиімді механизмін құруға мүмкіндік береді.

«Жүйені енгізу еліміздің тұрғын халқының дәрілік қауіпсіздігін арттыру, тұрғын халықтың өмірі мен денсаулығына төнетін қатерлерді төмендету, медициналық өнім қозғалысының барлық сатыларында қадағалау жүйесін қалыптастыру міндеттерінің тұтас ауқымын шешуге мүмкіндік береді. Сонымен қатар, ол өкілетті органдардың мониторинг өткізу және ақпараттық қолдау құралы қызметін атқарады, бұл медициналық өнім айналымы саласындағы бақылауды айтарлықтай арттырады», - деп атап өтті ДЗСҰО Бас директорының орынбасары.

Жүйедегі өнімді қадағалау екі өлшемді DataMatrix штрих-коды үлгісінде екіншілік қаптамаға түсірілетін бақылау-сәйкестендіру белгісі (БҚБ) бойынша жүргізіледі.

2023 жылы республикада айналымда жүрген дәрілік заттарды міндетті таңбалау енгізіледі.