Қазіргі кезде Әселдің әпкесі де ауруханада жатыр. Әкімнің айтуынша, оған барлық қажетті көмек көрсетіледі.
ERNUR.KZ. Алматы қаласының әкімі Ерболат Досаев "Аккент" тұрғын үй кешіндегі өрт кезінде қайтыс болған әйелдің отбасына көңіл айтты, деп жазады sputnik.kz.
1 тамызда Алматыда болған өрт кезінде адамдар балконнан балаларын лақтырып, артынан өздері де секірген. Сол кезде бір әйел ауыр жарақат алып, қайтыс болды.
"Қайрат Жармұхамедұлы мен Жұмагүл Жұмашқызы, сіздердің қайғыларыңызға ортақтасып, көңіл айтамын. Әселдің өмірден мезгілсіз өтуі сіздер үшін ғана емес, барлық алматылықтар үшін орны толмас ауыр қайғы. Туған баласынан айырылу ата-ана үшін өте ауыр. Орны толмас ауыр қазада сіздерге сабыр мен төзімділік тілеймін", - делінген Алматы әкімінің көңіл айту хатында.
Қазіргі кезде Әселдің әпкесі де ауруханада жатыр. Әкімнің айтуынша, оған барлық қажетті көмек көрсетіледі.
"Сіздердің қыздарыңыз, Әселдің әпкесі Айжанның тезірек сауығып кетуін тілеймін. Оның толық сауығуы үшін барлық қажетті медициналық көмек көрсетіледі", - деп атап көрсетті Досаев.
Айта кетері, 16 қабатты үйде болған өрт кезінде 43 адам зардап шекті. Төрт бала жансақтау бөліміне түсті. Тағы төрт бала медициналық көмектен кейін үйіне жіберілді. 12 ересек адамның ішінен бес адам ауруханаға жатқызылды.
