Қазақстан құрамасы көшпенділер ойындарының үшінші күні қоржынға 12 алтын салды

0
125

Жарыстың үшінші күні ел спортшылары 12 алтын, 7 күміс, 5 қола медаль жеңіп алды.


Қазақстан құрамасы көшпенділер ойындарының үшінші күні қоржынға 12 алтын салды

фото:Спорт комитеті

АСТАНА, 4 қыркүйек — Sputnik. Көршілес қырғыстан елінде өтіп жатқан VI Дүниежүзілік көшпенділер ойындарында Қазақстан қанжығасы жаңа рекордтармен толықты.
Әлемнің 113 елінен 3000 спортшы қатысып жатқан тартысты додада ұлттық құрамасы үш күнде 12 алтын, 7 күміс, 5 қола медаль жеңіп алды.

Аударыспақтан 100 келі салмақта ел намысын қорғаған әлем чемпионы, осы ойындардың екі дүркін жеңімпазы Ізбасаров Сырым байырғы қырғызстандық қарсыласын айқын басымдықпен жеңіп, үшінші рет жеңіс тұғырына көтерілді. Аударыспақтың алтын салмағы 90 келіде ел үмітін ақтаған Өткелбай Дарын қарсыластарының барлығын айқын басымдықпен жеңіп, алтын жүлде иегері атанды. Аса ауыр салмақта жарыс жолына шыққан Еркінұлы Нұржан қола жүлдені қанағат тұтты.

Құсбегіліктен ел құрамасы сапында өнер көрсеткен 9 спортшының төртеуі жеңіс тұғырына көтерілді. Атап айтқанда:

алтын медаль - "қаршыға" бойынша Жалғасұлы Серікболсын "Жебе" деген құсымен;
күміс медаль - "бүркіт" бойынша Қошқаров Арман "Алғыр" атты қыранымен;
күміс жүлде - "ителгі" бойынша Бабажан Бақдәулет "Ұшқыр" атты құсымен;
қола медаль - "ителгі" бойынша Кенжетаев Ерлан "Ақбалық" атты құсымен.
Ойындар бағдарламасына көшпенді елдердің 14 түрлі күресі енсе, жарыстың үшінші күнінде отандастарымыз самбо мен қырғыз күресінен өнер көрсетті. Самбодан Сапар Болат (+98 келі) алтын, Нығметов Еркебұлан (79 келі) мен Бейсенбаев Жандос (64 келі) қола жүлдеге ие болды.

Жанкүйерлердің ерекше ықыласына ие болған арқан тартыстан құрама мүшелері бүгін де алтын жүлде олжалады. Кеше спортшыларымыз "8x8" бағдарламасы бойынша ақтық сында қырғыз елінен басым түсіп, алтын алса, бүгін "4x4" бағдарламасының ақтық сынында ирандық спортшыларды жеңді.

Алдағы күндері спортшыларымыз 21 спорт түрінен жарыс жолына шығады: көкпар, көкбөрі, аламан бәйге, құнан бәйге, жорға, ұшқыр бәйге, дөнен бәйге, қазақ күресі, гюлеш, гуштини милли гамарбанди, хапсағай, овари, мангала, тоғызқұмалақ, ат марафоны, ордо, жамбы ату, дәстүрлі садақ ату, арқан тартыс, стронгмэн, тазы жарысы бойынша жарыстар өтеді.