Донорлық ағзаларды ұзақ уақыт күткен төрт пациентке трансплантаттау бойынша сәтті операциялар жасалды.
Қайтыс болғаннан кейінгі донор ЖКО-дан алған жарақаттардан қайтыс болған 18 жасар жас жігіт. Оның туыстары ағзаларды алуға келісімін берді, деп хабарлайды ERNUR.KZ ҚР Денсаулық сақтау министрлігіне сілтеме жасап.
ҚР Денсаулық сақтау министрлігінің Трансплантаттауды және жоғары технологиялық медициналық қызметтерді үйлестіру жөніндегі республикалық орталығы (ТЖТМҚҮРО) донорлық және трансплантаттау процесін жедел ұйымдастырды. Көп ағзалық алу барысында бауыр, жүрек және екі бүйрек алынды.
2024 жылғы 25 шілдеде мамандар ағзаларды трансплантаттау бойынша сәтті операциялар жүргізді.
Шымкент қаласының жүрек орталығында 1966 жылы туған пациент жаңа жүрекке ие болды, А.Н. Сызғанов атындағы Ұлттық ғылыми хирургия орталығында 1966 жылы туған пациентке бауыр, Түркістан облысының облыстық клиникалық ауруханасында 1984 жылы туған пациентке бүйрек, University Medical Center клиникасында 2008 жылы туған балаға екінші бүйрек трансплантатталды.
2024 жылғы 17 шілдеде де Қазақстанда сәтті трансплантаттаулар жүргізілген болатын. University Medical Center клиникаларында 1980 жылы туған әйелге жүрек, 1967 жылы туған әйелге өкпе және 2009 жылы туған балаға бүйрек, «ҰҒОО» ЖШС-да 1971 жылы туған ер адамға бауыр және 1981 жылы туған әйелге бүйрек трансплантатталды.
ТЖТМҚҮРО деректері бойынша 2023 жылы Қазақстанда қайтыс болғаннан кейін 7 донор тіркелді, бұл 19 ағзаны трансплантаттауға мүмкіндік берді. 2024 жылдың басынан бері қайтыс болғаннан кейінгі донорлардың саны бесеу болды, нәтижесінде 19 ағза трансплантатталды.
Денсаулық сақтау министрлігі қазақстандық мамандарды, медицина қызметкерлерін, әсіресе трансплантологтарды даярлау мен үйлестірудің жоғары деңгейін, сондай-ақ халық тарапынан қолдаудың артып келе жатқанын атап өтті.
Елде трансплантологиялық көмекті дамыту жөніндегі жұмыс жалғасады.
