Мәжіліс "Жаңа Қазақстан" депутаттық тобын тіркеді

ERNUR.KZ. Бүгін Мәжіліс төрағасы Ерлан Қошановтың төрағалығымен бюро отырысы өтіп, онда алдағы жалпы отырыстың күн тәртібінің жобасы нақтыланды, деп жазады inbusiness.kz.

Бюро отырысында депутаттарға Сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы заң жобасын бірінші оқылымда қарау ұсынылды.

Заң жобасында мемлекеттік қызметшілер, оларға теңестірілген адамдар, олардың жұбайлары шығыстарының аталған адамдардың кірістеріне сәйкестігін бақылау енгізіледі әрі фискалдық және мансаптық санкциялар белгіленеді.

"Бұл ретте әрбір жағдайда адамға шығыстарының заңдылығын негіздеу мүмкіндігі беріледі. Аталған жаңалықтарды халықты жалпыға бірдей декларациялаумен толық ауқымды қамтуды ескере отырып, 2027 жылдан бастап қолданысқа енгізу жоспарланып отыр", - деп жазылған хабарламада.

Түзетулердің екінші блогы сыбайлас жемқорлық фактілері туралы хабарлаған адамдарды қорғау жүйесін қалыптастыруға бағытталған.

"Сондай-ақ палата қарауына волонтерлік қызмет, қайырымдылық, мемлекеттік әлеуметтік тапсырыс және үкіметтік емес ұйымдарға арналған гранттар мәселелері бойынша түзетулер туралы заң жобасы бірінші оқылымда енгізілмек" - деп жазылған хабарламада.

Бюро отырысында қорғаныс өнеркәсібі және мемлекеттік қорғаныстық тапсырыс туралы заң жобасын жұмысқа алу мәселелері де қаралды. Сонымен қатар Мәжіліс бюросы "Жаңа Қазақстан" депутаттық тобын тіркеді.