Ел аумағына кіріп-шығатын тұқым материалының айналымын бақылау күшейтілмек.
ERNUR.KZ. Елімізде өсімдік тұқымы айналымын бақылайтын ақпарат жүйесі енгізіледі, деп жазады ҚазАқпарат.
Сенат депутаттарының сауалына жолдаған жауабында Премьер-Министр Әлихан Смайылов осындай мәлімет келтіреді.
«Агроөнеркәсіпті дамытудың 2021-2030 жылдарға арналған тұржырымдамасын іске асырудың жоспары аясында Селекциялық жетістіктердің мемлекеттік тізілімін жүргізуді ұсыну форматынан рұқсат беру (шектеу) сипатына регламенттеу мәселесі пысықталып жатыр», - деп жазады Үкімет басшысы.
Оның айтуынша, ел аумағына кіріп-шығатын тұқым материалының айналымын бақылау күшейтілмек. Ол үшін арнайы ақпарат жүйесі құрылады.
«Сондай-ақ, Ауыл шаруашылығы министрлігі тұқым айналымын бақылайтын ақпарат жүйесін құрып, енгізуді көздеп отыр. Бұл тұқым айналымын бақылаудың тиімді құралдарының бірі болмақ», - делінген Премьер-Министр жауабында.
