СҚО-дағы ауылда химикаттан уланып отыздан астам қой қырылып қалды

Әлеуметтік желіде әр жерде теңкиіп-теңкиіп жатқан қойдың өлекселері түсірілген видео тарады.

Арам өлген малды ер адамдар ауыл шетінен жинап, көзін жою үшін техникаға артты. Оқиға Шал ақын ауданы Кривощеков, халық арасында Заря деп аталып кеткен елді мекенде болған. Жергілікті шаруашылықтың аумағына кіріп кеткен қой төгіліп жатқан улы химикаттарды ішіп қойған.

Ауыл тұрғындарының айтуынша, бұған ұқсас жағдай бұрын да болған. Ол жолы жерді өңдеуге арналған химиялық зат МТМ аумағында төгіліп, бар өсімдік күйіп кетіпті. Улы химикаттар сақталатын үлкен ыдыстар Новопокровка ауылында да бар. Сондықтан тұрғындар мұндай оқиға әлі де қайталануы мүмкін деп қорқады. Улы зат құйылған ыдыс көлден 100 метрдей жерде ғана орналасқан екен.

Осы оқиғаға байланысты Шал ақын ауданы әкімінің орынбасары Арман Дүйсенбинов түсінік берді.

«Кривощеков ауылында ірі ЖШС бар. Олар қой өсірумен де айналысады. Қырылып қалған осы шаруашылықтың малы. Жұмысшылар байқамай, қой аумаққа кіріп кеткен. Салдарынан 34 бас өлді. Ауыл тұрғындары шығын шеккен жоқ», - деді Арман Дүйсенбинов.