Қазір құрылыс компаниялары 80 жеке үйдің іргетасын қалауға дайындық жүргізіп жатыр.
Атырау облысының Құлсары қаласында су тасқынынан зардап шеккен отбасылар үшін 150 үй салынады. Тұрғын үйлердің құрылысын күзде аяқтау көзделіп отыр, деп хабарлайды ERNUR.KZ.
Атырау облыстық құрылыс басқармасының басшысы Нұрберген Құсайыновтың айтуынша, қазір құрылыс компаниялары 80 жеке үйдің іргетасын қалауға дайындық жүргізіп жатыр.
«Құлсары қаласының «Болашақ» шағын ауданындағы алғашқы 80 үй «Қазақстан халқына» қоғамдық қорының қаражаты есебінен салынады. Тұрғын үйлердің құрылысын бастау үшін топырақты тегістеліп жатыр. Оған үш мердігер компаниядан 30 жұмысшы мен 20 арнайы техника тартылды», - деді Нұрберген Құсайынов.
«Атырау облысының әкімдігімен арада қол қойылған меморандумға сәйкес жергілікті атқарушы орган жаңа үйлер салу үшін жер учаскелерін суға баспайтын қауіпсіз аумақтан бөлуді қамтамасыз етеді. Жергілікті атқарушы орган құрылыс жүргізу мерзімі мен техникалық талаптардың сақталуын, құрылыс жұмыстарының сапасын бақылайды», - деп мәлім етті Нұрберген Құсайынов.
