Талдықорғанда ер адам өзін 15 жастағы оқушы ретінде таныстырып, жасөспірімге зорлық көрсеткен

ERNUR.KZ. Талдықорғанда 13 жастағы қызға зорлық көрсетіліп, интимдік сипаттағы бейнелер түсіруге мәжбүрлеген, деп жазады stan.kz.

Жасөспірімнің жақындарының айтуынша, оқиға 2025 жылғы жазда басталған. Қыздың мектептегі құрбысы оған танымал Telegram танысу арнасына тіркелуге кеңес берген. Қыз көп ойланбастан мессенджерге өз анкетасын орналастырған. Біраз уақыттан кейін оған жігіт жазып, өзін 15 жастағы жасөспірім ретінде таныстырған. Осылайша олардың таныстығы басталған.

Біраз уақыт өткен соң онлайн-танысы ашық сипаттағы бейне түсіруді ұсынып, әр минутына 2500-3000 теңге төлейтінін айтқан. Алғашында мектеп оқушысы келіспеген, бірақ құрбысының үгітінен кейін келісім берген. Екеуі бірге бейнежазба жасап, оны жаңа танысына жіберген. Кейін қыздың картасына уәде етілген ақша шынымен түскен.

Алайда бұл барлық жағдайдың басы ғана. Біраз уақыт өткен соң Telegram-дағы жігіт жеке кездесуді ұсынады. Қыздар көрсетілген мекенжайға барған, бірақ оларды жасөспірім емес, ересек ер адам қарсы алған. Ата-ананың сөзінше, ер адам қыздардың біреуімен оңаша қалған кезде жыныстық сипаттағы әрекеттер жасаған. Оқиғадан кейін ер адам қыздарға ақша беріп, чипс, шырын, тәттілер алып беріп, үйлеріне жіберген.

Кейін мектеп оқушыларына өзін сол ер адамның әйелі ретінде таныстырған әйел қоңырау шалып, хат алмасуды өшіруді талап етіп, болған жайтты біреуге айтса, қиындықтар болатынын айтып қорқытқан. Қорыққан балалар хат алмасуды өшірген. Бірақ ер адам тоқтамаған, келесі күні-ақ қыздар тағы да оның үйіне барған. Қалағанын алған соң, ол оларға шамамен 10 мың теңге берген. Екінші кездесуден кейін қыз енді онымен кездеспеуді шешіп, барлық мессенджерде бұғаттаған.

Біраз уақыттан соң қыз өзге жас жігітпен танысып, олардың арасында романтикалық қарым-қатынас басталған. Алайда қыздың құрбысы оны қорқытып, жаңа танысына мессенджердегі жігіт туралы ғана емес, оның не істегенін де айтып беремін деп сес көрсеткен. Жария болып кетуден қорыққан қыз бәрін жігітіне айтуға мәжбүр болған. Ең өкініштісі, сенім артқан жігіті де одан интимдік қатынас талап ете бастаған. Қыз келісім берген, бірақ біраз уақыттан кейін олар айырылысып кеткен. Жігіт қоштасарда бәрін қыздың анасына айтып берген.

Жасөспірімнің анасы Талдықорған қаласының полициясына арызданған. Онда Қазақстан Республикасы Қылмыстық кодексінің 122-бабы – “Он алты жасқа толмаған адаммен жыныстық қатынас немесе өзге де жыныстық сипаттағы әрекеттер” бойынша қылмыстық іс қозғалған.

Қазір іс сотта қаралып жатыр. Ең қызығы – қыз өз айтқандарынан айнып, зорлық жасағандарды қорғауға тырысып жатыр деген ақпарат бар.