Таразда бесінші сәбиін босанған ана көз жұмды: туыстары істің тергелуін талап етеді

Таразда Рысқұлов ауданына қарасты Тұрар ауылының 37 жастағы тұрғыны Ұлбосын Қарасаева көз жұмды. Бесінші баласын дүниеге әкелгеннен кейін әйел Жамбыл облыстық перинатал орталығында бір айға жуық жатқан. Осы уақыт ішінде оған бірнеше рет ота жасалып, кейінгі 12 күнін комада өткізген. 10 шілдеде оның қайтыс болғаны белгілі болды, деп жазады Ulysmedia.kz.

КТК мәліметінше, отбасы перзентханадан қуанышпен шығарып аламыз деп күткеннің орнына қара жамылып отыр. Марқұмның артында бес баласы, оның ішінде жаңа туған ұлы қалды.

Туыстарының айтуынша, әйел кесарь тілігі арқылы босанған. Нәресте аман-есен дүниеге келген. Алайда босанғаннан кейін екі күннен соң ананың қызуы көтерілген. Содан кейін жағдайы күрт нашарлай бастаған.

Емдеу барысында оған бес рет ота жасалған, ал қайтыс болар алдында алтыншы операция өткізілген. Күйеуінің сөзінше, дәрігерлер алдымен әйелдің жатырын, кейін көкбауырын алып тастаған. Одан соң асқазанына ота жасалып, соңғы күні тамағын тіліп, арнайы аппаратқа қосқан.

Марқұмның жолдасы Елдос Есеев әйелінің кейінгі 12 күн бойы комада жатқанын, есін жимастан көз жұмғанын айтты. Оның сөзінше, туыстарына операция жасалатыны алдын ала ескертілмеген.

Туыстары инфекция жұқтыруы мүмкін дейді

Марқұмның отбасы әйел ауруханада қауіпті инфекция жұқтыруы мүмкін деп күдіктенеді. Олардың айтуынша, дәрігерлер қазір жағдайды толғақ суының лай болуымен түсіндіріп отыр. Алайда туыстары бұл уәжбен келіспейді.

Олардың сөзінше, бала дені сау болып туған. Сондықтан бұл түсіндірме күмән тудырады.

Бұдан бөлек, марқұмның туысы жоспарлы кесарь тілігі алдында әйелден 30 мың теңге сұралғанын айтты. Оның сөзінше, Ұлбосын өзі отбасына хабарласып, жылап тұрып ақшаны қолма-қол бергенін айтқан.

Ауруханада тексеру басталды

Облыстық перинатал орталықта өлім себебіне қатысты пікір білдіруден бас тартты. Олар мұны дәрігерлік құпиямен байланыстырды. Дегенмен орталық өкілдері босанудың асқынумен өткенін, ал науқасқа медициналық көмектің толық көлемде көрсетілгенін хабарлады.

Жамбыл облысының денсаулық сақтау басқармасы әйел өліміне қатысты тексеру жүргізілетінін мәлімдеді. Оқиғаның мән-жайын Медицина және фармацевтиканы бақылау комитеті зерделейді. Сондай-ақ, қызметтік тергеу жүргізу үшін арнайы жұмыс тобы құрылады.

Өлімнің нақты себебі сот-медициналық сараптама аяқталғаннан кейін белгілі болады.

Туыстары кінәлілердің жазалануын талап етеді

Марқұмның отбасы оқиғаның толық әрі әділ тергелуін талап етіп отыр. Олар дәрігерлердің кінәсі дәлелденсе, жауаптылар заң алдында жауап беруі керек дейді.

Туыстарының айтуынша, бұл осы перинатал орталықта кейінгі жарты жылда болған екінші ұқсас жағдай. Қаңтарда мұнда 30 жастағы Салтанат Нышанбай көз жұмған. Алайда сол қайғылы оқиғаға қатысты тергеу қорытындысы әлі күнге дейін ресми түрде жарияланған жоқ.