ERNUR.KZ. Таразда көлік көшенің қақ ортасында қазылған жылу магистралінің шұңқырына түсіп кетті. Оқиға орнынан түсірілген видеоларды жергілікті пабликтер жариялады, деп жазады tengrinews.kz.
Оқиға жексенбіде Төле би көшесінде болған. Мұнда магистральдық жылу желілерін қайта жаңғырту жұмыстары жүргізіліп жатыр. Видеода жол талғамайтын көліктің жолдың дәл ортасында қазылған үлкен шұңқырға түсіп кеткені көрсетілген. Зардап шеккендер бар, соның ішінде балалар да. Кадр сыртындағы дауыс жүргізушілерге қауіп туралы ескертетін бірде-бір белгі жоқ екенін айтады.
Оқиғаның мән-жайын Жамбыл облыстық Полиция департаменті хабарлады.
"16 маусымда сағат 17:50-де Төле би көшесімен Абай көшесі бағытында Lexus RX300 көлігінің жүргізушісі "3.1 Кіруге тыйым салынады", "1.23 Жөндеу жұмыстары" жол белгілерін елемей, жолдың жабық бөлігіне өтіп кеткен. Магистральдық құбыр жөнделіп жатқан жолда қоршалмаған шұңқырға түсіп кеткен", - делінген хабарламада.
Апат салдарынан жүргізуші, оның әйелі және кәмелетке толмаған екі баласы зардап шекті. Оларға медициналық көмек көрсетілді. Полицейлер мердігердің үстінен қылмыстық іс қозғады. Тергеуге дейінгі тексеру жүргізіліп жатыр.
Қала әкімшілігі мәліметінше, бұған дейін бұл жолдың жабылатыны туралы ақпарат әлеуметтік желілер мен БАҚ-та таратылып, арнайы жол белгілері орнатылған.
![](/assets/thumbnails/b1/b1ffaa7012121d78c3aaed67d05992e2.jpg ""Отбасылы еркектің уәдесіне сеніп жүріп, жастық шағым өтіп кетті"")
![](/assets/thumbnails/32/32f7127a597cb8cf0f33659091d8e767.jpg ""Кинодағы актерден қызғанып жүр" - келіншек күйеуінің түсініксіз қылығын айтты")
