Жануарларға зорлық-зомбылық көрсететіндер адамдарды аямайды – Абаев

ERNUR.KZ. Бүгінде жануарларға деген қатыгездік мәселесі ақпараттық кеңістікте күн тәртібіндегі өзекті мәселелердің бірі болып отыр, дейді Дәурен Абаев, деп жазады azattyq-ruhy.kz.

«Желіде жануарларды азаптау, ұрып-соғу және қорқытып-үркіту көріністері бар бейнелер жиі пайда болады. Бұл қоғамның кінәлілерді әділ жазалауға деген заңды талабын туындатып отыр. Алайда шағын айыппұлдар азаматтардың наразылығын туғызуда. Мұндай прецеденттердің салдары, бір қарағанда, әлдеқайда ауыр. Психологияда зорлық-зомбылықты көріп тұрып, жағдайды өзгерте алмау, жәбірленушіге көмектесе алмайтындарға қатысты «куәгерлер жарақаты» деген түсінік бар. Бұл үмітсіздік пен өзін кінәлі сезінуге соқтырады. АҚШ-тағы Солтүстік-шығыс университеті мен Массачусетс ұйымы 1997 жылы талдау жүргізіп, жануарларға зорлық-зомбылық көрсеткендердің адамдарға қарсы зорлық-зомбылық қылмыстары бес есе, ал ұрлық пен тонау қылмыстары төрт есе көп екенін анықтады», - деп жазды Президент әкімшілігі басшысының бірінші орынбасары.

ҚР Қылмыстық кодексінде жануарларға қарсы әрекет еткендерге қатысты 316-бап (Жануарларға қатыгездік) бар. Осы баптың бірінші бөлігінде қарастырылған ең ауыр жаза - 120 сағатқа дейін қоғамдық жұмыстарға тарту немесе 30 тәулікке қамауға алу. Ресми мәліметтерге сәйкес, соңғы үш жылда жануарларға қатыгездік көрсеткені үшін 3 адам сотталды. Абаевтың мәліметінше, бір ғана «KARE-Zabota» ұйымына жануарларға қатыгездік көрсеткендер жайлы айына 500-ге тарта шағым түседі.

«Біз көптеген таңқаларлық жағдайлар туралы бұқаралық ақпарат құралдарынан, еріктілер мен жануарлар құқығын қорғаушылардың жазбаларынан білеміз, соның арқасында жаңа заң қабылдауға шақыру жиіледі. Шынында да, бүгінде елде үй, жабайы және ауылшаруашылық жануарларын құқықтық қорғауды қамтыған бірыңғай заң жоқ. «Ветеринария туралы», «Жануарлар әлемін қорғау, өсімін молайту және сақтау туралы» және басқа заңдар жануарларды емдеуді жеткілікті түрде реттемейді. Мысалы, қолданыстағы заңнамада жануарларға арналған баспаналар ұғымы және оларды салудың стандарттары жоқ, үй жануарларын серуендеу мен ұстау ережелері жоқ, қаңғыбас иттер мен мысықтарды аулау мен жою ережелері әртүрлі қалалар мен елді мекендерде әртүрлі. Қаңғыбас жануарларды ату процесі қоғамда көп сынға ұшырады», - деп жазады Абаев.

Оның сөзінше, жануарлар құқығын қорғаушылар жаңа заң әзірлеуге дауыс бере алатын арнайы сайт ашты. Бастаманы қолдау үшін ондаған мың қол жиналды. Абаев Президенттің қазіргі жағдайды және осы саладағы бұрыннан келе жатқан проблемаларды жақсы білетінін, сондықтан жолдауында Үкіметке «азаматтық қоғаммен бірге» тиісті заң жобасын әзірлеу туралы тікелей тапсырма бергенін де атап өткен.