Шетелге танымал алматылық 15 жастағы оқушы аспаздық кітабын жазып жатыр

Түрлі дәмді тағамдардың шебері, ерекше рецептерімен әлеуметтік желілерде танылып жүрген жас фудблогер «Юный повар» атымен танылған Дулат Тантаевты бәріңіз білетін боларсыздар. Оның 11 жасынан басталған аспаздыққа деген қызығушылығы бүгінде YouTube, TikTok және Instagram желілерінде оны тек Қазақстанға ғана емес, ТМД елдеріне де танымал етіп отыр.

Алматы қаласындағы №87 мектеп-гимназиясының 9-сынып оқушысы Дулат қазір 15 жаста. Бүгінде оның YouTube арнасында 1,5 миллионнан астам жазылушысы бар, ал TikTok пен Instagram желілерінде көрермендер саны 2 миллионнан асып жығылады. Жас талант өзінің YouTube арнасынан алтын батырма алып үлгерді.

Дулаттың аспаздыққа қызығушылығы ас үйде анасына көмектесуден басталған. Алғаш жасаған тағамы – қуырылған жұмыртқа болса да, қазір оның мәзірінде десерттен бастап күрделі еуропалық тағамдарға дейін бар.

"Басында жай ғана қызық үшін жасадым. Кейін достарым менің тағамдарымды мақтап, видеолар түсіруге кеңес берді. Солайша TikTok-қа алғашқы видеомды жүктедім. Қолдаулар көп болды, сондықтан әрі қарай тоқтамай, әртүрлі рецепттермен бөлісе бастадым," – дейді Дулат.

Дулаттың блог арқылы ең алғашқы табысы оның өміріндегі ерекше оқиға болған. 13 жасында блогтан тапқан алғашқы табысына өзіне iPhone 13 сатып алған.

"Өз еңбегіңмен алған заттың қадірі ерекше болады екен. Ол мені одан әрі еңбек етуге шабыттандырды," – дейді ол қуанышпен.

Қазіргі таңда ол:

• YouTube желісінде 1,5 миллион жазылушыға жетіп, "Алтын батырма" иегері атанған;
• TikTok және Instagram желілерінде 2 миллионнан астам тұрақты көрермені бар;
• Аспаздық байқауларда бірнеше мәрте жүлделі орынға ие болды. Атап айтсақ:
• 2023 жылы Алматы қаласында өткен "Junior Chef Challenge" байқауында бірінші орынды жеңіп алды. Бұл байқауда жас аспаздар ұлттық және халықаралық тағамдарды дайындаудан бақ сынасты. Дулат ерекше сәнделген десерт ұсынғаны үшін жоғары баға алды.
• 2024 жылы Ресейдің Мәскеу қаласында өткен "Юные кулинары СНГ" халықаралық байқауында "Ең үздік авторлық тағам" номинациясын жеңіп алды. Бұл байқауда оның ерекше стейк рецепті мен шығармашылық танытуы әділқазылардың көңілінен шықты.
• 2024 жылы Алматы қаласында өткен жас блогерлер байқауында "Үздік контент" номинациясын жеңіп алған;
• Қазір аспаздық кітап жазып жатыр, бұл кітапта ең танымал әрі оңай дайындалатын тағамдардың рецептері болады.

15 жасында осынша жетістікке жеткен Дулаттың жетістігінің басты сыры - қарапайымдылығы мен ерекше стилінде. Ол тағам дайындауды жеңіл әрі қызықты етіп түсіндіреді. Әсіресе балалар мен жасөспірімдерге арналған контенті ерекше танымал. Дулат видеоларында әртүрлі аспаздық лайфхактарымен бөлісіп, көрермендерді күлкіге бөлейді. Сонымен қатар, оның әр видеосы сапалы монтаждалып, жарқын кадрлармен толтырылған. "Юный повар" бейнесі арқылы ол тек Қазақстанда ғана емес, Ресей, Өзбекстан, Қырғызстан сияқты көрші елдерде де кеңінен танылып отыр. Десек те, мектеп пен блогты қатар алып жүру оңай емес. Бірақ Дулат сабақ пен шығармашылықты нақты жоспар құрып, сол жоспар арқылы үйлестіруге тырысады.

"Сабақтан кейін міндетті түрде үй тапсырмасын орындап, содан соң ғана бейнежазба түсіруге кірісемін. Аспаздық мен үшін демалыс сияқты," – дейді ол.

Дулат өз қатарластарына арманнан қорықпай, өз қабілеттерін дамытуға кеңес береді:

"Қазіргі заманда интернеттің арқасында кез келген нәрсені үйренуге болады. Аспаздық болсын, басқа хобби болсын, бастысы – қызығушылық пен еңбек. Ешқашан тырысуыңды тоқтатпа!" – дейді ол.

Дулат Тантаевтың жетістігі – табандылық пен шығармашылықтың жарқын үлгісі. Оның жетістігі басқа оқушыларға да шабыт береді. Жас та болса, үлкен армандарға сенімді қадам басып келеді. "Юный повардың" келешекте әлемге әйгілі шеф-аспаз атанарына еш күмән жоқ.

Материалды дайындаған: Мейрханқызы Ж.