Газдан уланған болуы мүмкін: ​Шымкентте төрт адам көз жұмды

сурет: ЖИ

Шымкент қаласындағы Студенттер қалашығы шағынауданындағы көпқабатты үйлердің бірінен төрт адамның мәйіті табылды. Алдын ала болжам бойынша, қайғылы оқиғаға табиғи газдың таралуы себеп болуы мүмкін.

Оқыс оқиға салдарынан әртүрлі пәтерде тұратын төрт адам қаза тапты. Бірінші пәтерден 31 жастағы әйел мен 16 жастағы жасөспірім қыздың денесі табылған, екінші пәтерден 23 жастағы жігіттің мәйіті анықталған. Ал үшінші жалдамалы пәтерде тұрған 20 жастағы студент қыздың денесін пәтер иесі жуынатын бөлмеден тапқан.

Үй тұрғындарының айтуынша, бұған дейін де пәтерлерде газ иісінің шығып жатқаны туралы шағымдар болған. Алайда, газ қызметі тарапынан әзірге ресми түсініктеме берілмеді.

Қазіргі таңда полиция департаменті оқиға орнында тергеу амалдарын жүргізіп жатыр. Аталған факті бойынша сотқа дейінгі тергеп-тексеру басталды.

Құзырлы органдар оқиғаның нақты себептерін анықтау мақсатында тиісті сараптамалар тағайындады.

Бұл – өте қайғылы жағдай. Осындай оқиғалардың алдын алу үшін газ жабдықтарын мерзімді тексеріп тұрудың маңызы зор.