КӨШПЕЛІ КЕЗДЕСУ: ШЫМКЕНТ ӘКІМІ ҚАРАТАУ АУДАНЫ ТҰРҒЫНДАРЫНЫҢ МӘСЕЛЕСІН ТЫҢДАДЫ

13.03.2025 09:03

130

Қала әкімі тұрғындарға белсенділігі мен ортақ мәселелерді шешуге деген ынтасы үшін алғысын білдірді.

Шымкент қаласының әкімі Ғабит Сыздықбеков Қаратау ауданының тұрғындарымен көшпелі кездесу өткізіп, азаматтардың ұсынысы мен мәселелерін тыңдады.

Кездесуде Нұрсәт, Астана, Қызыл су шағынауданы және Сайрам мен Өтеміс тұрғын алаптарының халқы көкейкесті мәселелерін көтерді.

Кездесу барысында қаланы абаттандыру, аулаларды жарықтандыру, көгалдандыру жұмысын күшейту, баспанаға қолжетімділікті арттыру, жер телімдерін заңдастыру және білім беру мекемелеріндегі оқу үдерісін жүйелеу мәселелері талқыланды.

Сонымен қатар, тұрғындар коммуналдық қызметтердің сапасын жақсарту, қолөнершілерге қолдау көрсету, жолдарды кеңейту, автотұрақ санын көбейту және ирригациялық жүйелерді жаңғырту жөнінде ұсынысын білдірді.

Ал Сайрам және Қызыл су тұрғын алаптарының халқы Наурыз саябағында спорт алаңын салу, шалғай көшелерге жаяу жүргіншілер өткелін орнату және жарықтандыру жүргізу қажеттігін алға тартты.

Қала әкімі тұрғындарға белсенділігі мен ортақ мәселелерді шешуге деген ынтасы үшін алғысын білдірді. Аудан әкімі мен тиісті басқарма басшыларына көтерілген мәселелерді жан-жақты зерттеп, нақты шешім шығаруды тапсырды.