Биыл Қазақстанда бірқатар ірі технологиялық алаңдар ұйымдастырылады.
Қазақстан Республикасының Премьер-Министрі Олжас Бектенов Digital Qazaqstan халықаралық форумы аясында қатысушыларға арнаған сөзінде бұл бастама ауқымды халықаралық іс-шаралар сериясының бастауы екенін атап өтті.
Үкімет басшысының айтуынша, биыл Қазақстанда бірқатар ірі технологиялық алаңдар ұйымдастырылады. Атап айтқанда, GITEX Орталық Азия және Кавказ, AI & Digital Bridge, сондай-ақ 100-ден астам елдің қатысушыларын біріктіретін «Болашақ ойындары» өткізіледі. Сонымен қатар, тамыз айында жасанды интеллект бойынша халықаралық олимпиада жоспарланған.
Олжас Бектенов форумның ашық диалог пен ынтымақтастық алаңы екенін атап өтіп: «Біз барлық ниет білдірушілерді осы іс-шараларға қатысуға және өңіріміздің жаңа цифрлық экожүйесін қалыптастыруға үлес қосуға шақырамыз. Біз бірлескен жұмысқа, жаңа идеяларға, технологияларға және ұзақ мерзімді жобаларға ашықпыз», – деді.
Премьер-Министр қатысушыларға жемісті жұмыс пен мазмұнды пікірталастар тілеп, форумның елдің цифрлық дамуына серпін беретін маңызды платформа екенін жеткізді.
