Шымкентте “Халық заңгері” республикалық акциясы өтті

Шымкент қаласында М.Әуезов атындағы ОҚУ-де «Халық заңгері» жалпыреспубликалық акциясы өтті, деп хабарлайды ERNUR.KZ.

Қыркүйек айында Қазақстанның барлық ірі қалаларында «Халық заңгері» жалпыреспубликалық акциясы басталды.

Аталған акцияның мақсаты — халықтың құқықтық сауаттылығын арттыру және тегін заң көмегін көрсету.

Акцияға белгілі адвокаттар, нотариустар, прокурорлар, тергеушілер, сот орындаушылары, мемлекеттік органдардың басшылары және т.б. сала өкілдері қолдау білдірді.

Сондай-ақ халықты қабылдау процесін ұйымдастыруға волонтерлар белсенді қатысып, олар тұрғындарды сұрақтарына байланысты қажетті мамандарға бағыттап отырды.

Айта кетейік, акцияны ұйымдастырушылар ҚР Сыбайлас жемқорлыққа қарсы іс-қимыл агенттігі, zakon.kz желілік басылымы, «Параграф» ақпараттық жүйесі, мемлекеттік билік органдары және Қазақстанның үздік заңгерлері мен адвокаттары.

Бүгінде «Халық заңгері» акциясын өткізу дәстүрге айналды және қарапайым қазақстандықтар өз алғыстарын білдіруде. 2016-2019 жылдар аралығында акцияға 7000-нан астам үздік сарапшылар мен мемлекеттік органдардың шешім қабылдай алатын құзіретке ие өкілдері қатысты. Құқықтық көмекке жүгінген 100 000-нан астам азамат кеңес алды. Олардың барлығы да алған қызметтеріне көңілі толатыны айтқан.

Карантиндік шектеулер енгізілген кезеңде «Халық заңгерін» өткізу тоқтатылған болатын. 2022 жылы санитарлық-эпидемиологиялық жағдайдың қалыпқа келуіне байланысты осы әлеуметтік маңызы бар іс-шараны қайта бастау туралы шешім қабылданды.

Акция форматының Қазақстанда ғана емес, сондай-ақ ауқымы мен географиясы бойынша әлемде теңдесі жоқ екенін айта кеткен жөн.