ТҮРКІСТАН: Келестіктердің маңызды мәселелері шешіліп келеді

Түркістан облысының әкімі Дархан Сатыбалды келестіктермен жүздесті, деп хабарлайды ERNUR.KZ.

Биыл Келес ауданының қайта құрылғанына 5 жыл толды. Ақпанда өткен Түркістан облысының әкімі Дархан Сатыбалдының есепті кездесуінде келестіктер көтерген мәселелер шешімін тапты. Атап айтқанда, шалғайда орналасқан Бекбота мен Ащыкөл елді мекендерін жалғайтын автомобиль жолына асфальт төсеу мәселесі толық шешілді. Жүзімдік пен Лесбек Батыр елді мекендерінен өтетін тозығы жеткен республикалық автомобиль жолын жөндеуге 2,9 млрд.теңге қаралды.

Аудан халқының басым бөлігі ауыл шаруашылығымен айналысатын аймақта ағын су өткізу мүмкіндігін арттыру үшін каналдарды жөндеу мен механикалық тазалау жұмыстары жүргізілуде. Бүгінгі күнге 41 шақырымды құрайтын 16 канал тазаланды. Ынтымақ елді мекенін ауыз су және сапалы электр қуатымен қамтамасыз ету үшін 1 миллиард теңгеге жуық қаржы бөлініп, құрылыс жұмыстары жүргізілуде. Нысан осы жылы пайдалануға беріледі. Тұрғындар сұранысымен Абай ауылында жалпы құны 1,8 млрд.теңге болатын заманауи спорт кешенінің құрылысы басталды.

Түркістан облысының әкімі Дархан Сатыбалдының халықпен есептік кездесуі бүгін Келес ауданында жалғасты. Ел алдында есеп берген облыс басшысы биылғы жылдың алғашқы жартыжылдығын қорытындылап, іске асқан жұмыстардың мән-жайын тұрғындарға баяндады. Алға қойылған мақсат-міндеттер мен қолға алынатын маңызды жобаларды жеткізді.

Ауданның қайта құрылуы экономикасының дамуына тың серпін берді. Жалпы өңірлік өнім көлемі 2020 жылдан бері 44 пайызға өсіп, былтыр 100 млрд. теңгеге жетті. Биыл 6 айда бұл көрсеткіш 30 млрд. теңгені құрап, 9 пайызға артты. Құрылыс жұмыстарының көлемі соңғы 3 жылда 30 пайызға өсіп, былтыр 10 млрд. теңгеден асты. Биыл жарты жылда 1,5 млрд. теңгеге құрылыс жұмыстары атқарылды. Былтыр негізгі капиталға 17,7 млрд. теңге инвестиция бағытталып, есепті кезеңмен салыстырғанда 35 пайызға артқан.

Биыл 6 айда 7 млрд. теңге инвестиция тартылып, өткен жылдың тиісті кезеңімен салыстырғанда 40 пайызға артып отыр. Ауданда алдағы 3 жылда 51 млрд. теңгеге 4 инвестициялық жобаны іске асыру жоспарлануда.

«Нұрболат» өндірістік кооперативі құны 3 млрд. теңгені құрайтын 5 филиалдан тұратын «Азия Мед» медициналық орталығының құрылысын жүргізуде. Филиалдары Абай ауылының екі жерінде, Біртілек, Ошақты және Ұшқын ауылдық округтерінде бой көтереді. Қазіргі уақытта Абай ауылында және Біртілек елді мекенінде «Азия Мед» медициналық орталығының құрылысы аяқталып, іске қосылды. Жоба толық іске асқан соң 200 жаңа жұмыс орны ашылады. «UBS KZ» және «UBS Solar» компаниялары құны 5,6 млрд. теңгені құрайтын 50 гектар жер учаскесіне күн электр станциялары құрылыс жұмыстарын бастады. Биыл іске қосылып, 20 адам тұрақты жұмыспен қамтылады. Келес ауданында еліміздегі ең үлкен жылыжай кешенінің қазығы қағылды. 500 гектар аумақта орналасатын өнеркәсіптік жылыжайлар жобасын «ЭКО-культура» компаниясы жүзеге асырады. Оның ішінде 51 гектардан астам жер учаскесінде жылыжай кешенінің құрылысын осы жылы бастау көзделуде. Жобаның 1-кезеңінің құны 42 млрд. теңгені құрайды. 700-ден астам жергілікті тұрғын жұмыспен қамтылады. Жеке кәсіпкер бастамасымен 200 млн. теңгеге қонақ үй салынады», – деді Дархан Сатыбалды.

Ауданда индустриялды аймақты құру мақсатында Ақтөбе ауылдық округі аумағынан 300 гектар жер учаскесі бөлініп, қажетті инфрақұрлыммен қамтуға барлық мүмкіндіктер бар. Бұдан бөлек, бүгінгі күні кәсіпкерлерді қолдау бойынша түрлі мемлекеттік бағдарламалар жүзеге асырылуда. Жеңілдетілген несиелендіру бойынша өткен жылы облыстың бизнес субъектілеріне 46,5 млрд. теңге бағытталса, ағымдағы жылы кәсіпорындарды 50 млрд. теңгеге несиелендіру көзделуде. Бизнесті қолдау үшін қажетті шаралар қабылданған. Әкімдік осы бағыттағы кез-келген бастаманы қолдауға дайын.

«Әкімдерге қоятын басты талаптарымның бірі – жаңа кәсіпорындарды ашу, жаңа жұмыс орындарын құру, аймаққа инвестицияларды тарту. Келес ауданы тұрғындарының еңбекқорлығын, ауданымыздың географиялық мүмкіндіктерін ескере отырып, жаңа өндіріс орындарын ашу қажет. Құрметті жерлестер, сіздердің алдарыңызда, аудан басшылығына және кәсіпкерлеріне осы бағытта нақты жобаларды ұсынуды тапсырамын. Ауданның еңбекқор тұрғындары осы туған өлкені әрі қарай дамытуға бар күш-жігерін салады деп сенемін. Мемлекет басшысы елді мекендерді абаттандыруға, олардың тазалығына ерекше назар аударады. Аудан, қалаларды аралаған кезде көгалдандыру, абаттандыру бойынша бірқатар тапсырма берген болатынмын. Абай ауылын абаттандыруға аранайы эскиздік жобалар әзірленіп, ауданның даму жоспарына енгізілді. Жарықтандыру мен абаттандыру жұмыстары жүргізілуде. Барлық елді мекендердегі тазалық мәселесін қатаң бақылауда ұстау қажет. Осы елдің тумасы ретінде мен де айтылған әрбір мәселенің қаншалықты маңызды екенін терең түсінемін. Сондықтан, әрбір жағдайды жеке бақылауға алып, оң шешімін табуына атсалысатын боламын. Алдағы кезеңдер Келестің нағыз өркендеген, дамыған дәуірі болады деп сенемін», – деді облыс әкімі.

Келестегі шағын және орта бизнестің саны былтыр 13 мыңға жетті. Олармен өндірілген өнім көлемі 33 млрд. теңгені құрады. Биыл Келес ауданында қосымша 2,5 мың жаңа шағын және орта бизнес субъектісі тіркелді. Аудан бюджетінің өзіндік кірісі соңғы 3 жылда 34 пайызға артып, былтыр 1,8 млрд. теңгені құрады. Биыл 6 айда бюджеттің өзіндік кірістері 1,6 млрд. теңгеге орындалып, өткен жылдың ұқсас кезеңімен салыстырғанда 60 пайызға ұлғайған. Ауыл шаруашылығының даму қарқыны тұрақты. Жалпы 26 мың гектар суармалы егіс алқаптары орналасқан. Озық технологияны қолдана отырып, жылына 2-3 өнім алу бойынша былтыр 350 шаруа қожалық жалпы 1,5 мың гектарға егіс еккен. 2027 жылы бұл көрсеткішті 4 мың гектарға дейін жеткізу жоспарлануда.

Ағын суды үнемдеу мақсатында 348 гектар тамшылатып суғару әдісі енгізілді. Бұл әдіс негізінен алма бауларына қолданылған. 2027 жылға 3 мың гектарға тамшылатып суғару әдісін енгізу жоспарлануда.

«Ауыл аманаты» бойынша Келес ауданда 114 жоба бойынша құжаттары мақұлданып, 52 жобаға 258 млн. теңге несие берілді.

Соңғы 3 жылда сапалы ауыз сумен қамтылу көрсеткіші 23 пайызға артып, 81 пайызды құрады. Қазіргі уақытта аудан тұрғындарын ауыз сумен қамту үшін 3 млрд. теңгеге 5 нысанның құрылысы жүргізілуде.

Сапалы электр жүйесімен қамтылу 76 пайызды құрады. Аудан аумағында 8 елді мекеннің құрылысы жүргізіліп, биыл пайдалануға тапсырылады. Абай ауылының жаңа тұрғын жайларын электрмен қамту үшін 290 млн. теңге бөлініп, құрылыс жұмыстары биыл аяқталады.

Көшелер жарықтандырылып, биыл 8 елді мекеннің газдандыру жұмыстары аяқталды. Қамту көрсеткіші 77 пайызды құрады. Жұмыстар жалғасуда. Облыстық маңызы бар «Абай – Шардара» жолының 29 шақырымына орташа жөндеу жұмыстары тамыз айында басталады (жалпы құны – 1 851млн.тенге).

300 орындық 2 мектептің құрылысы биыл жыл соңына дейін аяқталады. «Жайлы мектеп» ұлттық жобасы аясында Келес ауданында жаңадан 5 мектеп салынады. Бұдан бөлек, Ескіқорған, Жуантөбе елді мекендерінде 300 орындық мектептердің құрылысы келесі жылы басталып, 2025 жылы пайдалануға беріледі.

Соңғы 3 жылда аудан аумағында 8 кіші футбол алаңшалары салынды. Биыл Абай ауылында спорт кешенінің құрылысы басталды. Нысан 2024 жылға өтпелі (1,8 млрд. теңге, 600 млн. теңге бөлінді).

Ұлттық жобалар бойынша осы жылы жаңа жұмыс орындарына 273 адамды жұмыспен қамту көзделген. «Еңбек» бағыты бойынша 3 мыңнан астам адам жұмыспен қамтылды. Мемлекет басшысының «10 мың тұрғынға 100 тұрақты жұмыс орындарын ашу» жөніндегі тапсырмасының аясында 100-ден астам адам жұмыспен қамтылды.

Кездесуде облыс әкіміне Келес ауданының тұрғындары түрлі ұсыныстары мен пікірлерін айтты, өтініштерін жеткізді. Сонымен бірге жеке қабылдауда да өзекті мәселелер көтерілді. Әрбір сұраққа жауап беріліп, хаттамаға енгізілді. Облыс әкімінің халықпен кездесулері басқа аудан, қалаларда жалғасын табады.