ТҮРКІСТАН: Өзбекстаннан 10 мың түп гүжім ағашы әкелінеді

Түркістанда климатқа қолайлы саналатын қарағаш пен терек егіледі, деп хабарлайды ERNUR.KZ.

Түркістанды көгалдандыру үшін Өзбекстаннан 10 мың түп гүжім ағашы әкелінеді. Сонымен бірге жергілікті климатқа қолайлы саналатын қарағаш пен терек егіледі. Күзгі ағаш егу науқанының барысын бақылаған Түркістан облысының әкімі Өмірзақ Шөкеев облыс орталығындағы бірқатар нысандарды аралады. Қаланы көгалдандыру бағытында атқарылып жатқан іс-шараларды, аудан, қала әкімдіктері мен басқармалардан жасақталған секторлардың жұмысын пысықтады.

Бүгінде Түркістан қаласы көгалдандыру және абаттандыру жұмысын жүйелі жүргізу мақсатында 32 секторға бөлінген. Аудан, қала әкімдіктері мен басқармалар тұрақты түрде өздеріне бөлінген аумаққа көшет егіп, оның өсіп шығуын жауапкершіліктеріне алған.

Секторлардың жұмысын жандандыру мәселесі облыс әкімі аппаратында да арнайы қаралып, облыс басшысы тарапынан тиісті тапсырмалар берілген болатын.

«Біріншіден, әрбір көшет, жасыл желекке су барып тұруы тиіс. Егер тұрақты суғарылса, Түркістанда ағаш өседі. Екіншіден, біздің климатқа төзімді қарағаш, терек, акация және өзге де ағаштарды өсірген жөн. Үшіншіден, сол көшеттер тамыр алып кеткенше желден қорғап, сынып кетпеуі үшін арнайы қорғауды қамтамасыз ету қажет», - деген өңір басшысы секторларға жауапкершілігі жоғары, қоғамға жанашыр азаматтарды тартуды тапсырды.

Сондай-ақ, арық жүйелерін суландыру жұмыстары мен жаңа нысандардың айналасын абаттандыруды бақылаған облыс басшысына бірқатар жаңа жобалар таныстырылды. Бүгінгі секторларды аралау барысында да бірқатар ескертпелер айтылып, тиісті тапсырмалар берілді.