"Артемиданың" миссиясы: "Орион" кемесі Айға дейінгі жолдың жартысын жүріп өтті

Экипаж 6 сәуірде Ай маңынан ұшып өтуге дайындалады.

NASA мәліметінше, ұшудың үшінші күні экипаж Айдың бетінде орналасқан нысандар тізімін қарастырған. Бұл тізімді Айды зерттеу ғылыми тобы жіберген. Аталған нысандарды 6 сәуір күні алты сағатқа созылатын ұшып кезінде суретке түсіріп, талдайды.

Ұшу сағат 14:45-те басталады, осы уақытта “Орион” кемесінің иллюминаторлары Айға бағытталып, Жер серігінің жанынан өтеді.

NASA кеше және бүгін Айды, ал болашақта Марсты игеру кезінде негізгі байланыс құралы болуға тиіс жаңа оптикалық байланыс технологиясын сынақтан өткізді.

Бұл технологияда ақпарат бұрынғыдай радиотолқындар арқылы емес, лазер сәулесін модуляциялау арқылы беріледі. Ғарыш кемесі лазер сәулесін Жердегі қабылдағыш құрылғыға бағыттайды, ал қашықтық жүздеген мың шақырымға жетеді.

Лазер сәулесі өте жіңішке болғандықтан, жүйеге жердегі станцияға өте дәл бағытталу қажет. Осындай үлкен қашықтықта тіпті өте аз ауытқудың өзі сигналдың Жерден өтіп кетуіне әкелуі мүмкін. “Орионнан” жіберілген сигналдарды Калифорния мен Нью-Мексико штаттарындағы жерүсті станциялары қабылдайды.

Лазердің көмегімен деректерді секундына 260 Мбит жылдамдықпен жеткізуге болады. Бұл болашақта Жерге 4K форматтағы бейнені нақты уақытта жіберуге мүмкіндік береді.

Алайда бұл технологияның шектеулері де бар: лазер сәулесі радиотолқындар сияқты бұлттардан өте алмайды. Сондықтан әзірге дәстүрлі байланыс арналары толықтай тоқтатылмайды.