Францияда 15 жасқа толмаған балаларға әлжелі қолдануға салынған тыйым алып тасталды

ERNUR.KZ. Францияның Конституциялық кеңесі 15 жасқа толмаған балаларға әлеуметтік желі қолдануға тыйым салуды көздеген заңды тоқтатты. Судьялар құжаттың қазіргі нұсқасы пікір білдіру еркіндігіне тым көп шектеу қояды әрі қолданушылардың жасын тексеру кезінде жеткілікті кепілдік бермейді деп шешті, деп жазады Ulysmedia.kz.

Заң жобасына сәйкес, әлеуметтік желілер 15 жасқа толмаған балалардың платформаларға кіруіне жол бермеуі керек еді. Алайда оны іске асыру үшін компаниялар ересектерді қоса алғанда, барлық қолданушының жасын тексеруге мәжбүр болатын.

Конституциялық кеңес заңда мұндай тексерудің нақты қалай жүргізілетіні және жеке деректерді өңдеу кезінде қандай шектеулер болатыны көрсетілмегенін атап өтті. Осыған байланысты құжат жеткілікті деңгейде пысықталмаған деп танылды.

Макрон жаңа заң әзірлеуді тапсырды

Бұл шешім әлеуметтік желілерге жас шектеуін енгізуді белсенді түрде қолдап келген президент Эмманюэль Макронның бастамасына кедергі болды. Енді ол премьер-министр Себастьен Лекорнюге Конституция талаптарына қайшы келмейтін жаңа заң жобасын әзірлеуді тапсырды.

Елисей сарайы билік бұл бастамадан бас тартпайтынын мәлімдеді.

Бұған дейін, 21 шілдеде, заңды Франция парламентінің екі палатасы да мақұлдаған еді. Жоспар бойынша, 1 қыркүйектен бастап 15 жасқа толмаған балаларға әлеуметтік желілерде жаңа аккаунт ашуға тыйым салынуы керек болатын.

Платформаларға мұндай қолданушылардың бұрыннан бар парақшаларын 2027 жылғы 1 қаңтарға дейін өшіруге уақыт беру көзделген.

Сонымен қатар, құжатта жоғары сынып оқушыларының телефон пайдалануына шектеу қою және онлайн-платформаларда қолданушылардың жасын міндетті түрде тексеру талаптары қарастырылған.

Франция неге әлеуметтік желілерді шектеуге шешім қабылдады

Бұған әлеуметтік желілердің балаларға әсеріне қатысты алаңдаушылық себеп болды. Францияның денсаулық сақтау органдары бұған дейін TikTok, Instagram және Snapchat қолданудың бірқатар қаупі бар екенін ескерткен.

Олардың қатарында өзін-өзі бағалаудың төмендеуі, өзіне зиян келтіру әрекеттерінің көбеюі, суицидтік мінез-құлық пен есірткі қолдану қаупінің артуы аталды.

Заңды талқылау кезінде келтірілген деректерге сәйкес, әрбір екінші жасөспірім смартфонға күніне екі сағаттан бес сағатқа дейін уақыт жұмсайды. Ал олардың 58 пайызы телефонды әлеуметтік желі үшін пайдаланады.