Reebok, Nike, Puma өзбек мақтасына бойкот жариялады

ERNUR.KZ. Reebok, Nike, Puma компаниялары өзбек мақтасын сатып алмайды, деп жазады azattyq-ruhy.kz.

«Шетелдік брендтер тарапынан тоқыма өнімдеріне бойкот бүгінгі күні негізсіз, негізсіз», – деп мәлімдеді Өзбекстан сыртқы сауда және инвестиция министрі Сардор Өмірзақов Cotton Campaign коалициясы өкілдерімен кездесуде.

Cotton Campaign – Өзбекстанда және Түрікменстанда мақта жинау кезінде балаларды мәжбүрлі түрде еңбек еткізуге қарсы құқық қорғау ұйымдарының бірлестігі.

«Қазіргі уақытта өзбек шикізаты мен оның өнімдерін сатып алуға Reebok, Nike, Puma, IKEA және тағы 300-ден астам бренд бойкот жариялады. Мұндай қадам Cotton Campaign елде мәжбүрлі еңбек жоқ екеніне көз жеткізгенше жалғасады», - делінген жазбада.

Өмірзақовтың айтуынша, республика барлық қажетті шараларды қолға алып жатыр. Саладағы жалақы өсуде, ал еңбекке мәжбүр еткен адамдарға қатысты қылмыстық істер жүргізілуде. Министр мұндай жағдайлар барын жоққа шығармайды. Ол Cotton Campaign белсенділерін осындай фактілермен бөлісуді сұрады.

Айта кетейік, өткен жылы Өзбекстанда еңбекке мәжбүрлегені үшін айыппұлды 10 есеге 6,6 млн сомға ($700) дейін арттырды. Осы жылы жаза қатаңдатылды. Тәртіп бұзушы 11,1-ден 22,2 млн сомға дейін ($1,1-2,3 мың) төлейді. Ал тағы қайталаса қылмыстық іс қозғалады.