Тасжолға құлаған бала орнынан тұрып, басқа көліктердің жолына қарай жүгірген. Оны оқиға болған жерге тоқтаған басқа жүргізуші ұстап үлгерді.
ERNUR.KZ. Ресейде екі көліктің соқтығысына куә болған жүргізуші фургонның терезесінен тасжолға құлап түскен кішкентай баланы санаулы секундта көтеріп алып кетті, деп жазады sputniknews.kz.
Жергілікті БАҚ-тың хабарлауынша, жол апаты 4 маусымда Хабаровск қаласында болған.
Кадрдан Toyota Hiace көлігінің жүргізушісі қиылысқа жақындап келіп, қарсы бағытқа бұрылмақшы болғаны көрінеді. Ер адам қиылыстың орта тұсына жетпей, рұқсат етілмеген жерден маневр жасап, жол ережесін бұзған. Осы кезде басқа бір шетелдік көлік фургонның бүйірінен соғады.
Төрт жасар бала соққыдан жолға ұшып түскен, ал әкесі есінен танып қалып, Toyota Hiace бір орынды айналып жүре бастайды. Баланы құдай сақтап, жарақат алмаған, бірақ ол қатты қорқып кетіп, әкесінің көлігінің артынан жүгіреді, оны көлік қағып кетуі мүмкін еді.
Дәл осы сәтте апат куәгері көмекке келеді: ер адам баланы көтеріп алып, көлігіне отырғызған.
Жергілікті құқық қорғаушылардың мәліметінше, екінші көлікті жүргізген әйел мас болған, бағдаршамның қызыл түсіне өтіп кетіп, ол да жол ережесін бұзған.
Toyota Hiace жүргізушісі басынан жарақат алып, ауруханаға жатқызылды. Балаға ауруханаға барудың қажеті болмады.
