Ақмола облысында ер адам әйелінің өмірін тозаққа айналдырған

03.04.2025 12:14

222

Әлеуметтік желіде тараған видеода жәбірленуші күйеуі бірнеше айдан бері қудалап келе жатқанын айтқан.

видео кадры

ERNUR.KZ. Ақмола облысының полициясы жұбайы қыр соңынан қалмай жүргенін айтқан әйелдің жағдайына байланысты тергеу бастады, деп жазады tengrinews.kz.

Ақмола облысында әйел күйеуінен басқа қалада жасырынуға мәжбүр. Оның айтуынша, Көкшетаудан көшіп кеткеніне қарамастан, күйеуі ізінен қалмаған. "НеМолчи" қорының мәліметі бойынша ер адам әйелін және оның отбасын қорқытқан, тіпті бір хатында әйелді өлтіріп, денесін бөлшектеп тастайтынын жазған.

Қор ақпаратына сүйенсек, жақында күдікті әйелінің ата-анасының көлігіне зақым келтіріп, дөңгелектерін тесіп, нөмірлерін жұлып тастаған. Оған қоса көлікке және пәтердің есіктеріне анайы суреттер салып кеткен.

Әлеуметтік желіде тараған видеода жәбірленуші күйеуі бірнеше айдан бері қудалап келе жатқанын айтқан.

"5 желтоқсанда көлік пен есіктерге зақым келтірді, 5 қаңтарда терезелерді сындырды, 9 ақпанда пышақпен қорқытты, ал 22 және 28 наурызда тағы да анайы суреттер салып, бейнебақылау камераларын жоюға тырысты", - дейді видеода әйел күйеуі туралы.

Полиция департаменті бұл жағдайға қатысты ҚК-нің 115-бабы 1-бөлігі ("Қорқыту") бойынша қылмыстық іс қозғалғанын хабарлады.

"Қазір күдіктіні ұстау және оны ішкі істер органдарына жеткізу бойынша іс-шаралар жүргізіліп жатыр. Сондай-ақ, Көкшетау қаласы тұрғынының күйеу баласына бұрын түсірген барлық арызы тіркелді. Олар бойынша тексеріс жүргізіліп, тиісті шаралар қабылданады", - деді Ақмола облысы Полиция департаменті өкілі.