ЖИ
ERNUR.KZ. Шығыс Қазақстан облысында жол жөндеу жұмыстары кезінде адам сүйегі табылды. Оқиға орнынан түсірілген видео әлеуметтік желіге тарағаннан кейін қол-аяғы байланған қыздың мәйіті табылды деген ақпарат пайда болды. Алайда полиция бұл мәліметті жоққа шығарды, деп жазады Ulysmedia.kz.
Жол жөндеушілер не тапты?
Адам сүйегі Өскемен – Риддер тасжолына жақын, Радуга елді мекені маңынан табылған. Оқиға орнында түсірілген видео әлеуметтік желіде тарады.
Желіде тараған жазбаларда жұмысшылар қол-аяғы байланған қыздың мәйітін тауып алғаны айтылған. Кейбір қолданушылар адам сүйегі жол жөнделіп жатқан жерге топырақпен бірге жеткізілуі мүмкін деген болжам жасаған.
Жергілікті тұрғындардың бірі Быструха маңындағы көпірдің жанынан үнемі қиыршық тас өндірілетінін айтқан. Оның болжамынша, мәйітті бұл жерге өзен ағысы алып келуі мүмкін.
Полиция не анықтады?
Шығыс Қазақстан облыстық Полиция департаменті адам сүйегі табылғанын растады. Бұл дерек бойынша соталды тергеу басталды.
Алайда тәртіп сақшылары әлеуметтік желіде тараған ақпараттың алдын ала анықталған деректерге сәйкес келмейтінін мәлімдеді.
«Алдын ала мәлімет бойынша, табылған қаңқа қалдықтары ер адамға тиесілі. Қазір марқұмның жеке басын анықтау және өлімінің себебін білу үшін тиісті шаралар жүргізіліп жатыр. Оның қол-аяғы байланған деген ақпарат шындыққа жанаспайды», – деп хабарлады полиция.
Қазір тергеушілер табылған сүйектің кімге тиесілі екенін және ол адамның қандай жағдайда көз жұмғанын анықтап жатыр.


