Ақтөбеде екі зейнеткерді өлтірген ер адам өмір бойына бас бостандығынан айырылды

Қылмыс 2025 жылдың 13 қаңтарында болды. Қанды оқиға болған күні 38 жастағы ер адам зейнеткерлердің үйіне терезеден кіріп, үй иелерінің келуін күтіп отырған. Әйел келген бойда 20 рет пышақ жарақатын салып, жертөлеге тастаған. Осыдан кейін оның қызына тап беріп, қол-аяғын байлап тастаған.

Кейін отағасын пышақтап, балтамен ұрып, жертөлеге тастаған. Ерлі-зайыпты алған жарақатынан көз жұмды.

"Зейнеткерлерді өлтірген адам олардың қызын кепілде ұстаған. Полиция онымен 3 сағат келіссөз жүргізген. Арнайы операция кезінде олар үйге басып кіріп, үй иесінің қызын босатып, жедел жәрдем шақырғанымен, қарттарды аман алып қала алмаған", - деп жазды басылым.

Сотталушы екі адамды өлтірді, өмірге қауіпті күш қолдану арқылы заңсыз бас бостандығынан айырды және денсаулыққа қасақана орташа ауырлықтағы зиян келтірді деп айыпталды.

Сотталушы марқұмдардың туыстарынан кешірім сұрады. Отбасылы, кішкентай баласы бар екенін, оны өсіргісі келетінін айтып, қатаң жаза кесуді, бірақ өмір бойына бас бостандығынан айырмауды сұрады.

Дегенмен сот оны өмір бойына бас бостандығынан айыру жазасына кесті, бұған қоса ол қайтыс болған зейнеткердің туыстарына материалдық шығын үшін 7 миллион теңге және моральдық шығын үшін 20 миллион теңге өтеуге тиіс.