Almaty SuperSki: жас мамандар үшін жаңа мансаптық мүмкіндіктер

фото:bestnews.kz

ERNUR.KZ. «Almaty SuperSki» жобасы мен Алматы тау кластерінің дамуы қонақжайлылық пен спорттан бастап көлік, сервис және техникалық пайдалануға дейінгі бірнеше бағыттағы құзыреттерді қажет ететін неғұрлым күрделі туристік экожүйенің қалыптасуына алғышарт жасайды.

Болашақ курорт аумағында ұзындығы шамамен 60 шақырым болатын тау шаңғысы трассаларын салу жоспарланған. Олардың өткізу қабілеті тәулігіне 10 мыңнан астам шаңғышыны қабылдауға мүмкіндік береді. Бұл ретте трассалардың шамамен 70%-ы балалар мен жаңадан үйренушілерге арналмақ. Мұндай ауқым заманауи курорттың спорттық инфрақұрылым, сервис, қауіпсіздік, көлік және келушілерге қызмет көрсетуді біріктіретін біртұтас жүйе ретінде жұмыс істеуін талап етеді.

Бұл түлектер үшін кәсіби бағыттарды кеңейтеді.

Ең айқын бағыттардың бірі – туристік және қонақүй сервисі. Заманауи курортқа қонақтармен жұмыс істей алатын, орналастыруды ұйымдастыратын, туристік ағындарды сүйемелдейтін, клиенттік сервисті жолға қоятын және қызмет көрсету сапасын қамтамасыз ететін мамандар қажет. Ірі туристік аумақтар дамыған сайын қонақжайлылық стандарттарын білу ғана емес, түрлі санаттағы келушілермен – отбасылармен, балалармен, спортты жаңадан бастағандармен және шетелдік туристермен жұмыс істей білу де маңызды бола түседі.

Жеке бағыт спорттық мамандықтармен байланысты. «Almaty SuperSki» инфрақұрылымының едәуір бөлігі балалар мен жаңадан үйренушілерге бағытталатындықтан, адамдарды тау шаңғысымен қауіпсіз әрі түсінікті түрде таныстыра алатын нұсқаушылардың, жаттықтырушылардың және басқа да мамандардың рөлі артады.

Бұл Алматы қаласының әкімдігі мен Kazakh Tourism Development компаниясының болашақ курорт аумағында дене шынықтыру сабақтарын өткізу мүмкіндігін пысықтап жатқанын ескергенде ерекше маңызға ие. Осылайша, тау инфрақұрылымы туристік алаң ғана емес, спорттық білім беру кеңістігіне де айнала алады.

Тағы бір кәсіби бағыт – курорттың техникалық инфрақұрылымын пайдалану.

Заманауи тау шаңғысы инфрақұрылымы трассаларды, көтергіш жабдықтарды, инженерлік жүйелерді және ілеспе нысандарды тұрақты күтіп-ұстауды талап етеді. Сондықтан дәстүрлі туристік мамандықтармен қатар техникалық құзыреттердің де маңызы артады: жабдықтарды пайдалану, олардың жағдайын бақылау, инфрақұрылымның үздіксіз жұмысын ұйымдастыру және қауіпсіздікті қамтамасыз ету.

Көлік және логистика бағыты да маңызды. Курорт тәулігіне 10 мыңнан астам келушіні қабылдайтын жағдайда адамдар қозғалысының, көлік қызметінің және инфрақұрылымның түрлі элементтері арасындағы өзара байланыстың қаншалықты тиімді ұйымдастырылғаны шешуші рөл атқарады. Бұл көліктік жоспарлау, логистика және келушілер ағынын басқару саласындағы мамандар үшін жаңа мүмкіндіктер қалыптастырады.

Нәтижесінде ірі туристік жобаның айналасында тұтас кәсіби бағыттар тізбегі қалыптасады. Курортқа тек қонақүй қызметкерлері немесе нұсқаушылар ғана емес, техникалық мамандар, көлік саласының қызметкерлері, сервис ұйымдастырушылары, маркетологтар және басқа да кәсіби кадрлар қажет.

Түлектер үшін бұл бірнеше саланың тоғысында мансап құру мүмкіндігін білдіреді.

Алматы тау кластерін дамытудың ауқымды әсерінің бірі де осында. Заманауи туристік инфрақұрылым бір ғана мамандыққа емес, өзара байланысты құзыреттер жиынтығына сұраныс қалыптастырады.

Осы тұрғыда «Almaty SuperSki» жобасын инфрақұрылымдық бастама ретінде ғана емес, жаңа кәсіби траекториялар қалыптасуы мүмкін болашақ алаң ретінде де қарастыруға болады. Туристік өнім неғұрлым күрделі болған сайын, оның жұмыс істеуіне қажетті құзыреттер ауқымы да кеңейеді. Бұл өз кезегінде жас мамандар үшін жаңа мүмкіндіктер ашады.