Астанада көлік аялдамаға соғылды: Ауруханаға 8 адам жеткізілді

«29 қыркүйек күні №1 көпсалалы қалалық ауруханаға жедел жәрдем желісі бойынша 7 адам оқиға орнынан жеткізілді. Кешенді қарау мен мамандар алқасының қорытындысынан кейін 2 адам жарақаттар мен протездеу бөліміне жатқызылды. 5 науқас амбулаторлық емге жолданды. Олар өздері тіркелген аурухананың бақылауында болады», – деді басқармадан.

Жарақат алғандардың арасында 5 жасар қыз бар.

«Сондай-ақ жедел жәрдем желісі арқылы №2 көпсалалы қалалық балалар ауруханасына 2018 жылы туған қыз бала оқиға орнына жеткізілді. Оны травмотолог, нейрохирург, жақ сүйегі мен бетке маманданған хирург қарады. Рентгенографияға түсіріліп, миға компьютерлік томография жасалды. Жарақаты гипспен таңылып, амбулаторлық емге жолданды», – деп нақтылады ведомствоның баспасөз қызметінен.

Бұған дейін хабарлағанымыздай, бүгін сағат 08.31-де «Mеrcedes-Benz» автокөлігі А.Байтұрсынұлы көшесімен Т.Жүргенов көшесіне қарай келе жатып, жолақ ауыстырар кезде өз бетімен кетіп бара жатқан «Mazda» көлігіне апат жағдайын туындатқан. Салдарынан «Mazda» жүргізушісі тізгінге ие бола алмай қалып, аялдамаға соғылған.