"Балама қару тақаған": Ұрланған жасөспірімнің әкесі оқиғаның қалай болғанын айтты

Тоғызыншы сыныптан соң колледжге түсіп, туысының үйінде жатып оқып жүрген бала өзін ұрлап әкетеді деп үш ұйықтаса түсіне кірмеген.

"Үйде жатқанда сыртқа шығып кетші деп қоңырау шалған. Көлікке отыр, былай шығып сөйлесейік деген. Баламның ойында дәнеңе жоқ, отыра кеткен. Біраз жүрген соң көліктің багажнигінен тағы екеу шығып, баламды ортаға алып отырып алған", - дейді жәбір көрген жасөспірімнің әкесі Ербол Әділханов.

Баланы ұрлап әкеткен – 4 адам, үшеуінің жасы 30, ал біреуінің жасы 15-те дейді.

"Былай алып шығып, тапанша, пышақ тақап, электрошокермен қорқытып, 5 млн теңге бересің деген. Одан 2 млн сұраған, дәл қазір тауып берсең 100 мың теңгемен де құтыласың деген. Балам ақшам жоқ деумен болған. 5 млн тауып бере алмаймын, босатсаңдар 100 мың теңге тауып көрейін деген. Күдіктілер кешкі сағат сегізге дейін уақыт берген", - дейді Ербол Әділханов.

Аман құтылған бала жалма-жан әкесіне хабарласады.

"Балам жылап тұр. Жанталасып балама бардым. Мен бірден жан-жаққа хабарластым, органдағы қызметкерлерден көмек сұрадым. Олар қолға түсіру үшін бар көмегін аямады. Баламның денесіне "жучок" орнатып сол жерге жіберді. Кешкі сағат төрттен бастап түнгі сағат екіге дейін аңдып жүрдік. Негізі дәл осылай бопсалаушылар көп екен. Мен бұл проблеманы жабу астында қалдырғым келмейді", - дейді жасөспірімнің әкесі.

Жасөспірім қазір үйде, денсаулығына келген зиян жоқ. Әйтсе де оқиға тергеліп, тынышталғанша демала тұруды жөн көрген.

Қазір күдіктілер қамауда, ал полиция тергеу жүргізіп жатыр.

"Тергеу барысында күдіктілердің жәбірленушіні интернетте жеке видеосын таратамын деп қорқытып, бопсалағаны анықталды. Жедел-іздестіру шаралары барысында полиция қызметкерлері күдіктілерді 500 000 теңгенің бір бөлігін алу кезінде қолға түсірді", - дейді Алматы облыстық полиция департаментінің баспасөз қызметі.