Биыл Қазақстанда көмір экспорты 21 пайызға артты

ERNUR.KZ. Осы жылдың қаңтар-шілде айларында Қазақстанда 66,4 млн тонна таскөмір, қоңыр көмір және көмір концентраты өндірілді. Бұл 2021 жылдың сәйкес кезеңімен салыстырғанда 5,8%-ға артық көрсеткіш, деп жазады azattyq-ruhy.kz.

Energyprom зерттеуінше, саладағы өндірістің 92,6 пайызы, яғни 61,5 миллионы тонна тікелей тас көмір болып отыр. Оның ішінде жылу көмірін өндіру 9,3 млн тоннаны, кокстелген көмір 4,5 млн тоннаны құрады. Қоңыр көмір (лигнит) өндіру 2,6 млн тоннаны, көмір концентраты 2,3 млн тоннаны құрады.

Өңірлік тұрғыдан өндірістің ең үлкен көлемі – 39 млн тоннасы – дәстүрлі түрде Павлодар облысына тиесілі, жылына 5% артық өндірілген. Одан кейін, әлбетте, Қарағанды облысы тұр – 21,3 млн.

«Жалпы, 2021 жылы еліміз кәсіпорындары 116,2 миллион тонна көмір өндірген, бұл бір жыл бұрынғыдан 2,5 пайызға артық көрсеткіш», - дейді сарапшылар.

2022 жылдың қаңтар-маусым айларының қорытындысы бойынша Қазақстан көмірге деген сұранысты (ішкі нарықтағы сату және экспорт) толық қанағаттандырды. Тас көмір ресурсының 30%-ға жуығы экспортқа шығарылды – 16,4 млн тонна көмір 457,4 млн АҚШ долларын құрады. Өсім физикалық мәнде 20,8%, ақшалай тұрғыдан 2,1 есе көп болды.

«Қазақстан ТМД елдеріне тас көмірдің ең көп көлемін – 156,2 млн долларға 10,9 млн тонна жеткізді. Атап айтқанда, жалпы экспорт көлемінің 62,2%-ы Ресейге тиесілі. Үш негізгі импорттаушы қатарына Қырғызстан мен Өзбекстан кіреді», - делінген зерттеуде.

ТМД-дан тыс елдерге Қазақстан 301,2 млн долларға 5,4 млн тонна көмір экспорттаса, соның ішінде жылына 73,1% алатын Швейцария – 3,7 млн тонна – негізгі бағыт саналады.

ҚР ИИДМ облыстар мен республикалық маңызы бар қалалар бойынша 2022-2023 жылдарға арналған көмірге сұраныс жоспарын қалыптастырды. Бюджеттік ұйымдар мен тұрғындар үшін көмірді алдын ала дайындауды көздейтін жол картасы әзірленді. Жоспар бойынша тұтыну көлемі шамамен 9,6 миллион тоннаны құрайды, оның 2,6 миллион тоннасы бюджеттік секторға, 7 миллион тоннасы халыққа тиесілі. Осы жылдың жеті айында халық пен бюджеттік ұйымдарға 4,5 миллион тонна көмір жөнелтілді, бұл өткен жылдың сәйкес кезеңімен салыстырғанда 10 пайызға артық көрсеткіш.

Сонымен қатар өткен жылғы халыққа арналған әлеуметтік көмірді арнайы тарифтер бойынша экспорттау фактілерін ескере отырып, көмірді автокөлікпен әкетуге тыйым салу туралы бұйрық әзірленді. Теміржолмен тасымалдауда еш шектеу жоқ.