Қарағанды облысында анасын ұрған экс-әкімнің баласы сотталды

Қылмыстық істі Қарағанды қаласының Қазыбек би аудандық соты ҚК 107-бабы 2-бөлігі 3-тармағы “Денсаулыққа қасақана ауырлығы орташа зиян келтiру” бойынша қарады.

Экс-әкімнің баласы 78 жастағы анасын ұрған.

“Сотталушы анасымен жанжалдасқан. Ол анасын ұрып, денсаулығына зиян келтірген. Салдарынан жәбірленуші жабық бас-ми жарақатын алған: миы шайқалған. Оң көз орбитасының бүйір қабырғасы, оң жақ бетсүйек доғасы, оң жақ гаймор қуысының алдыңғы және артқы қабырғалары сынған. Сондай-ақ жәбірленушінің 3,4,5,6-шы қабырғалары да сынған. Бірінші бел омыртқасының жабық, асқынбаған компрессиялық сынуы деген диагноз қойылды”, - дейді ведомство.

Прокурор сотталушыға 3 жылға бас бостандығынан айыру жазасын тағайындауды сұрады.

Сотталушы сотта кінәсін мойындамаған және жасаған ісіне өкінбеген.

“23 қыркүйекте сот үкімімен оған орташа қауіпсіздік қылмыстық-атқару жүйесі мекемесінде 3 жыл мерзімге бас бостандығынан айыру жазасы тағайындалды. 1 000 000 теңге көлемінде моральдық зиянды өтеу сомасы, сондай-ақ адвокаттарға төленген шығындар өндірілді”, - дейді аудандлық сот.

Сот үкімі заңды күшіне енген жоқ.