Қарағандыда логопед балаларды басынан ұрып, сабақ өткізген (ВИДЕО)

Баласы бұл педагогқа шамамен бір жыл бойы барып жүрген, ал ата-анасы логопедтің мұндай әрекеті туралы ештеңе білмеген. Әйелдің айтуынша, жұбайы баласының не істеп жатқанын көру үшін логопед кабинетіндегі төбеге жақын орналасқан кішкентай терезе арқылы телефонды көтеріп, түсіріп алған. Кейін видеоны көргенде, логопед баласының басынан ұрған сәтін байқап қалған.

«Бұл біз үшін үлкен шок болды. Біз оған бір жыл бойы барып жүрген едік, мұндайды елестету мүмкін емес болатын», – дейді әйел.

Анасының сөзінше, оқиғадан кейін логопедке қоңырау шалғанымен, отбасына ешқандай кешірім де, түсініктеме де бермеген. Ата-аналар баласының да болған жағдайды растағанын айтты. Олардың қолында видео да, баланың сөзі де бар.

Жазбада логопедтің балаларды көп қабылдайтыны, сабақтардың әр 30 минут сайын өтетіні айтылған. Сол себепті ерлі-зайыпты болған жайтты жариялауды жөн көрген.

«Біз мұны жариялауды жөн көрдік, себебі бұл логопедке күн сайын көп бала барады. Сабақтар – жарты сағат сайын. Бұл тек біздің баламызға қатысты ма, әлде басқа балаларға да осындай қарым-қатынас жасады ма, білмейміз. Әр ата-ана өзі шешеді, жалғастыра ма, жоқ па, бірақ мұндай жағдайдың болғанын халық білуі керек деп ойлаймын», – дейді баланың анасы.

Әйелдің айтуынша, видеода көрінген жағдай олар үшін күтпеген соққы болған.

«Ұлым үшін жүрегім ауырады, бұны бір жылдан кейін ғана байқап отырмыз. Кездейсоқ түсірілген видео біз мүлде ойламаған нәрсені көрсетіп тұр», – деп жазады ол.

Бұл оқиға әлеуметтік желіде үлкен резонанс тудырды. Пікір қалдырғандардың арасында осы логопедтен баласы зәбір көрген ата-аналар да табылды.

«Біз де оған барамыз. Демек балам өтірік айтпаған. Ол да шағымданған, біз сенбеген едік», «Алғашқы сабақтан кейін-ақ ұлым барғысы келмеген, бетінен ұратынын айтты. Мен логопедке жазып едім, ол бәрін жоққа шығарды. Балалар өтірік айтпайды», – деп жазды қолданушылар.

Қарағанды облыстық полиция департаментінің баспасөз қызметі агенттік тілшісіне берген түсініктемесінде видеожазбаның әлеуметтік желілерді мониторингтеу кезінде анықталғанын мәлімдеді. Оқиға бойынша тексеру басталды, барлық қатысушы анықталды.

«Материал полицияда тіркелді. 44 жастағы жеке логопед мән-жайды анықтау үшін бөлімге жеткізілді. Тексеру нәтижесі бойынша оның әрекеттеріне құқықтық баға беріледі», – деді ведомство өкілдері.

Полиция кәмелетке толмағандарға қатысты кез келген заңсыз әрекетке заң аясында қатаң құқықтық баға берілетінін атап өтті.