Қарағандыдағы жарылыс: Оқиғаға қатысты тың деректер пайда болды

ERNUR.KZ. Қарағанды облысындағы "Kazakhmys Energy" ЖШС-нің ЖЭС-2-дегі бу құбырының жарылуынан зардап шеккен үш адам әлі дәрігерлердің бақылауында, деп жазады Stan.kz.

Естеріңізге сала кетейік, апат 13 желтоқсанда болды. Абай ауданы, Топар кентіндегі ЖЭС-2-де 14-қазандықтың бу құбырында жарылыс болды. Төтенше жағдай кезінде 1958 жылы туылған қазандық бөлмесінің кезекші слесары қайтыс болды. Тағы үш зардап шегуші Қарағандыдағы Мақажанов клиникасына жатқызылды.

"Зардап шеккендердің барлығы бумен термиялық күйік алды. Зардап шеккендердің жағдайы тұрақты", - деді Қарағанды облысы ТЖ департаментінің бастығы Мұрат Катпанов.

Облыстық әкімдіктің хабарлауынша, жылу беру маусымы басталар алдында ЖЭС паспорттық бақылаудан өтіп, жұмысқа дайын болған. Оқиға Абай мен Топардың жылу және электр қуатына әсер еткен жоқ.

Төтенше жағдайдан кейін бірден нысанда жөндеу және қалпына келтіру жұмыстары басталды.

"Станция штаттық режимде жұмыс істейді, ол толық жылу жүктемесін көтереді. Температура кестесі сыртқы ауаның көрсетілген параметрлеріне сәйкес келеді. Станция барлық функцияларды толық көлемде қамтамасыз етеді", - деді Қарағанды облысының энергетика және тұрғын үй-коммуналдық шаруашылық басқармасының бастығы Ұлантай Үсенов.

Топарская ГРЭС "Kazakhmys Energy" ЖШС-не тиесілі. Оның бас директоры Темірлан Өтегенов марқұмдардың отбасына, сондай-ақ барлық құрбандарға жан-жақты көмек көрсетіледі деп сендірді.

Технологиялық бұзушылық фактісі бойынша энергетикалық қадағалау департаменті қызметкерлерінің, сондай-ақ басқа құзыретті органдардың қатысуымен тергеу жүргізіледі. Төтенше жағдайдың себептері 10 жұмыс күні ішінде анықталуы керек.

Айта кетейік, Қарағандыда электр станциясындағы жарылыстан ер адам қайтыс болды.