Қазақстан киберқылмыспен күресу үшін халықаралық әріптестіктер орнатып жатыр

0
104

Сонымен қатар Астана, Алматы қалаларында орналасқан 5 колл-орталықтың қызметі анықталып, жойылды.


Қазақстан киберқылмыспен күресу үшін халықаралық әріптестіктер орнатып жатыр

ERNUR.KZ. Киберқылмысқа қарсы іс-қимыл департаменті алаяқтарды анықтау мақсатында шетелдік әріптестермен белсенді қарым-қатынас орнатып, олармен тікелей байланыс және жедел ақпарат алмасу арналарын әзірледі. Мысалы, ағымдағы жылдың қаңтар айында мамандар Арменияда бірлескен операция өткізіп, Еуропа мен ТМД елдерінің тұрғындарын алдап келген алаяқтар ашқан 2 колл-орталығының көзін жойды. Олар азаматтарды ірі инвестициялық жобаларға ақша салу сылтауымен алдап отырған. Бұл жайлы ҚР Ішкі істер министрлігі киберқылмысқа қарсы іс-қимыл департаментінің бастығы Жандос Сүйінбай ОКҚ баспасөз мәслихатында мәлімдеді.

Сонымен қатар Астана, Алматы қалаларында орналасқан 5 колл-орталықтың қызметі анықталып, жойылды.

«Шетелдік әріптестермен ынтымақтастықты арттыру үшін Компьютерлік қылмыстар туралы Еуропа конвенциясы мен Киберқылмысқа қарсы іс-қимыл жөніндегі Біріккен Ұлттар Ұйымының Конвенциясына қосылу бойынша шаралар қабылдануда», – деді спикер.

Сондай-ақ Жандос Сүйінбай азаматтардың құқықтық және қаржылық сауаттылығы интернет-алаяқтықтың алдын алудың ең маңызды талабы екенін атап өтті.

Ол үшін қарапайым сақтық шараларын ұстану қажет:

- жеке деректерді ешкімге бермеу;

- сілтемелер мен қосымшаларға сақтықпен қарау;

- бейтаныс қоңырауларға сенбеу, ойланып жауап беру;

- таныстардан түрлі сұрау хабарламалар келген жағдайда, оларды тексеру;

- кез келген күмәнді жағдайда банкке не полицияға хабарласу.