Қазақстанда қандай әлеуметтік төлемдерді алып тастайды – министр жауап берді

Қазіргі кезде министрлікте сарапшылар тобы жасақталды. Олар күмәнді және тиімсіз әлеуметтік төлемдерді алып тастауға қатысты нақты ұсыныстарды әзірлейді. Премьер-министр бұл жұмысты 1 желтоқсанға дейін аяқтауды тапсырған болатын.

Еңбек және халықты әлеуметтік қорғау министрі Светлана Жақыпова төлемдер бойынша бір мысал келтірді.

"Мысалы, бүгінде мүгедектігі бар баланы үйде оқыту үшін ата-анаға жергілікті бюджеттен төлемдер беріледі. 500 теңгеден 1000 теңгеге дейін, 300 теңгеден 3 000 теңгеге дейін әлеуметтік төлемдер қарастырылған. Ал Конституция бойынша әрбір ата-ана өз баласына жауапты, оны оқытуға да, басқа жағдайлар жасауға да құқылы әрі міндетті. Ал мемлекет өз тарапынан мүгедектігі бар бала тіркелген мектепке жоғары тарифпен ақша береміз, оған қоса, ата-анасына да төлем беріледі. Міне, бұл – әділетсіздік. Сондықтан осы нормалар қайта қаралады", - деді Жақыпова мәжілісте өткен брифингте.

Министрдің айтуынша, республикалық бюджеттен төленетін жәрдемақылар тоқтатылмайды, тек жергілікті жерде, яғни әкімдіктер тарапынан берілетін төлемдер қайта қаралады.