Келесі жылы доллар бағамы 507 теңгеге дейін жетуі мүмкін - сарапшылар

ERNUR.KZ. Қазақстан қаржыгерлері қауымдастығының талдау орталығы 2024 жылғы қарашадағы кейбір индикаторларға қатысты қаржы нарығының кәсіби қатысушыларының кезекті сауалнамасының нәтижелерін ұсынады, деп жазады inbusiness.kz.

Зерттеуде қаржы нарығының кәсіби қатысушыларының, банк, сақтандыру, брокерлік ұйымдар өкілдерінің, талдау және қазынашылық бөлімшелері қызметкерлерінің пікірі зерделенді. Осы жарияланымда Brent маркалы мұнайдың құны, теңгеге қатысты доллар құны, инфляция, ЖІӨ, ҚР Ұлттық Банктің базалық мөлшерлемесі сияқты негізгі индикаторлар бойынша болжамдарға қатысты сұрақтарға респонденттердің жауаптары берілген.

Резюме

"Айлық инфляцияның екі еседен астам жеделдеуі (қыркүйекте 0,4%-дан қазан айында 0,9%-ға дейін) және оның өзгеруінің жоғары амплитудасы базалық мөлшерлеменің төмендеу циклінің қайта басталуына кедергі келтіреді. Қаржы нарығы сарапшыларының көпшілігі (75%) алдағы 29 қарашадағы Ұлттық банк отырысында мөлшерлеме 14,25% деңгейінде сақталуы мүмкін деп санайды. Қалған бөлігі (25%) мөлшерлеме 14,0%-ға дейін төмендейді деп есептейді. Бір жылдан кейін күтілетін инфляцияның орташа бағасы қазан айындағы 8,1%-дан 8,4%-ға дейін өсті", - делінген талдауда.

Сарапшылардың айтуынша, осыған байланысты базалық мөлшерлеменің екі таңбалы мәні келесі 12 айда сақталып, 13 пайызды құрауы мүмкін (қазір бұл көрсеткіш 14,25%-ға тең).

"Бір жылдан кейін экономикадағы нақты пайыздық мөлшерлеме қазіргі 5,75%-ға қарсы 4,5% болуы мүмкін. Нақты мөлшерлеменің төмендеуі, мұнай бағасының төмендеуін қайта қарау, импорттың үздіксіз өсуі, сыртқы борыш бойынша ірі төлемдер ұлттық валюта бағамына қысым көрсетуі мүмкін. Бір жылдан кейін ұлттық валюта бағамы бір доллар үшін 507,1 теңгеге дейін өсуі мүмкін (+3,1%). Алайда келесі айда ол долларына 487,1 теңгеге дейін нығаюы мүмкін. Бір жылдан кейін Brent баррелінің құны АҚШ пен ОПЕК+ тарапынан шикізат ұсынысының ұлғаюы, әлемдік экономикадағы жоғары ставкалардың мұнай сұранысына күтілетін теріс әсері аясында 77,4 доллар деңгейінде болжанып отыр", - делінген талдауда.