Қобдада уланған балалар тәттіні қайдан алған?

Облыстық денсаулық сақтау басқармасы баспасөз қызметінің берген мәліметтеріне сүйенсек, бұл оқиға Қобда ауданындағы орта мектепте болған. Мектеп оқушылары улану дерегімен аудандық ауруханаға түскен.

Мектеп оқушыларының бірі оқу орнынан тыс сатып алынған, шығу тегі белгісіз өнімді мектепке әкелгені анықталды. Оны жегеннен кейін 7 бала өзін нашар сезінген, ал қалғандары қатты иістен уланған, - дейді баспасөз қызметінің өкілі Іңкәр Қарашаева.

Бүгінде балалардың жағдайы жақсы. Олардың барлығына аудандық ауруханада қажетті медициналық көмек көрсетілді. Қазір балалар үйлерінде. Ал олар сатып алған белгісіз өнім сараптамаға жіберіліп, тергеу амалдары жүргізілуде.

Денсаулық сақтау басқармасының басшысы Ерлан Сұлтангереев пен облыстың бас балалар реаниматологы оқиға болған орынға тексеру жүргізуге барды. Балаларды облыстық көпсалалы балалар ауруханасының педиатрлар бригадасы тексерді, - дейді ол.

Біз бұл жағдай бойынша Қобда аудандық білім бөліміне хабарласқанбыз. Алайда бөлім мамандары пікір білдіруден бас тартты.

Облыстық санитарлық-эпидемиологиялық бақылау департаментінің басшысы Райхан Қойшанованың айтуынша, департамент мамандары Қобда ауданында орналасқан дүкенге тексеру жүргізілген. Нәтижесінде өнімді растайтын құжаттар ұсынылмаған, техникалық регламенттерге сәйкес таңбалары жоқ болып шыққан.

Бұл жағдай мектеп асханасымен байланысты емес. Қазір түсіндірме жұмыстары жүргізілуде. Облыста аталған өнім 2 сауда орнында сатылымда болғандығы анықталды. Зертханалық зерттеу жүргізуге жолданды, - дейді ол.

Еске сала кетейік, осыған дейін Ақтөбеде 23 оқушы тәттіден уланып, ауруханаға түскені туралы жазғанбыз.