Көмек сұраған қызды қорғаймын деп істі болған ер адамға үкім шықты

17.01.2023 09:30

404

Үкім заңды күшіне енген жоқ.

ERNUR.KZ. Павлодарда абайсызда кісі өлтірген ер адамға қатысты үкім шықты, деп жазады ulysmedia.kz.

Іс материалдарына сүйенсек, айыпталушы мас күйінде 2022 жылғы 1 тамызда Торайғыров көшесінде көмек сұраған бейтаныс қызды ер адам қолынан ұстап тұрғанын көрген. Ол адам өлтіру мақсатынсыз қыздың қолынан ұстап тұрған жігітті жұдырықпен бетінен ұрған. Соңғысы тепе-теңдігін жоғалтып, артқа құлаған. Салдарынан желкесін асфальтқа соғып, ауыр дене жарақаттан ауруханада қайтыс болған.

«Прокурор айыпталушыны екі жылға бас бостандығынан айыруды сұрады. Жәбірленушілер бас бостандығынан айыруды талап етті. Сотталушы өз кінәсін толық мойындап, бас бостандығынан айыруға байланысты емес жаза тағайындауды сұрады. Оның екі баласы мен науқас қарт анасы бар», – деп хабарлады Павлодар қаласы № 2 сотының баспасөз қызметі.

Сотталушының кінәсі толық дәлелденді.

Сот жазаны жеңілдететін мән-жайларды және ауырлататын мән-жайларды ескере отырып, айыпталушыны 104 ҚК-нің 1-бөлігіне сәйкес кінәлі деп таныды және ең төменгі қауіпсіздіктегі қылмыстық-атқару жүйесінде 2 жылға бас бостандығынан айыру жазасын тағайындады.

Сондай-ақ, жәбірленушілердің талаптары жалпы сомасы 4,4 млн теңгеге қанағаттандырылды.

Үкім заңды күшіне енген жоқ.