Мамандардың айтуынша, зардап шеккен алқаптары үшін олар 10 миллион тенгеге жуық сақтандыру ақысын алады.
ERNUR.KZ. Жазғы аптап ыстықта Жітіқара мен Қарабалық аудандарының астық алқабы біршама зардап шекті. Ресми мәліметке сүйенсек, 4 мың 600 гектар егін күйіп кеткен, деп жазады 24.kz.
Бұл сақтандыру ақысын алуға өтініш берген үш шаруашылықтың ғана егістік аумағы. Жалпы биылғы жылдың 5 маусымынан елімізде өсімдік шараушылығын сақтандырудың жаңа жүйесі енгізілді.
Берілген қысқа мерзімде көбі егістік алқаптарын сақтандырып үлгірмегенге ұқсайды. Облыс бойынша небәрі 4 шаруашылық құрылымы ғана сақтандыру шартын жасасқан.
Мамандардың айтуынша, зардап шеккен алқаптары үшін олар 10 миллион тенгеге жуық сақтандыру ақысын алады. Жаңа жүйенің тиімді тұстары көп.
"Жаңа сақтандыру жүйесінің артықшылығы бар. Біріншіден, бұл міндетті емес, ерікті түрде. Екіншіден, сақтандыру жарнасының жартысын мемлекет өтейді. Егер 1 мың гектар егін алқабы толық күйіп кетсе, 30 мың тенге нормативпен, ол 14 миллион 500 мың тенге сақтандыру төлемін алады" - дейді Дина Хамзина , ауыл шаруашылығы және жер қатынастары басқармасының бас маманы.
