Мэлс Елеусізов: Қазір қимылдамасақ, қырылып жойыламыз

ERNUR.KZ. Саяси партия арқылы табиғатқа араша түспек. Белгілі эколог Мэлс Елеусізов партия құрамын деп мәлімдеме жасады. Табиғат жанашыры экологиялық ахуал нашарлай түскен тұста жақтастары көбейетініне сенімді, деп жазады ktk.kz.

Мэлс Елеусізов партия құруға қажетті 40 мың адамның қолын жинау қиын емес дейді. Әдетте сайлау алдында саяси мәлімдеме жасай бастайтын экологтың бұл әрекеті бекер болмаса керек.

Парламентке өту ниетін Елеусізовтің өзі де жасырып отырған жоқ. Қоршаған ортаның қордаланған мәселесін Мәжіліс мінберінде көтеруді жоспарлап отыр. Осыған дейін Елеусізов бірнеше мәрте партия құру туралы бастама көтергенімен еш нәтиже шықпаған. Ол екі рет президент сайлауына да түскен.

"Үкімет бір нәрсе жасағандай болады, бірақ ештеңе жоқ. Қазіргі жағдай 30 жыл бойы мен айтқаннан жаман. Дұрыс заң шығу қажет. Ол үшін партия болуы керек. Партия депутаттарды сайлап шығару қажет. Сол себепті, партия құрудың кезегі келді. Апат көп. Дер кезінде қимылдамасақ, бәріміз қырылып, жойыламыз" - дейді «Табиғат» одағының төрағасы Мэлс Елеусізов.