Электровелосипедтерді басқару үшін "A1", "A" немесе "B" санатындағы көлік жүргізу куәлігі болуы қажет.
фото: Harley-Davidson
ERNUR.KZ. Петропавл қаласында электрвелосипедті мас күйінде жүргізген ер адам 20 тәулікке қамалды, деп жазады sputnik.kz.
Облыстық полиция депаратменті таратқан мәліметке сәйкес, Ақмола облысының 37 жастағы тұрғыны Воровской көшесінде ұсталған. Полицейлер оны алдымен медициналық куәландыруға апарған. Сол жерде оның мас күйде болғаны расталды.
"Ер адамның көлік басқару құқығы болмағандықтан, оған қатысты Әкімшілік құқық бұзушылық туралы кодекстің 608-бабының 6-бөлігі бойынша әкімшілік хаттама толтырылды. Сот шешімімен ол 20 тәулікке әкімшілік қамаққа алынды", - дейді тәртіп сақшылары.
Осы орайда полиция электрвелосипедті мас күйде басқару ауыр жол-көлік оқиғасына себеп болуы мүмкін екенін ескертеді. Әсіресе қараңғы уақытта жоғары жылдамдықпен жүру және қорғаныс құралдарын пайдаланбау жүргізушінің өзіне де, айналадағы адамдарға да қауіп төндіреді.
Айта кетері, заң бойынша жылдамдығы сағатына 25 шақырымнан асатын электровелосипедтерді басқару үшін "A1", "A" немесе "B" санатындағы көлік жүргізу куәлігі болуы қажет.
