Бұл учаске Ақжар ауданында орналасқан.
ERNUR.KZ. Солтүстік Қазақстан облысында еріген қар суы Ақжар ауданы арқылы өтетін республикалық маңызы бар «Көкшетау-Омбы» автожолының учаскесін шайып кетті, деп жазады inform.kz.
Бұл туралы «Darmen» мобильді қосымшасы хабарлама таратты.
«29 наурыз күні сағат 13.15 минут кеткенде республикалық маңызы бар «Көкшетау-Омбы» автомобиль жолының 85-183 км учаскесі еріген қар суы басуына орай жабылды», - делінген.
СҚО Төтенше жағдайлар департаменті баспасөз қызметінің мәліметінше, бұл учаске Ақжар ауданында орналасқан. Су басқан аумақтың ұзындығы әзірге 500 метр, тереңдігі – 40 см. Су әлі келіп жатыр. Сол себепті Чкалов елді мекенінен Талшық ауылына дейін жолды жабуға тура келген.
Мамандардың айтуынша, жақын маңдағы елді мекендерді су басу қаупі жоқ. Қазір оқиға орнында жергілікті атқарушы билік кезекшілік ұйымдастырған.
Бұған дейін СҚО-дағы Шағалалы өзенінің су деңгейі бір тәулікте 1,5 метрге дейін көтерілгенін айтқан едік.
Санитар дәрігерлер тасыған су жұқпалы аурулардың таралуына себеп болатынын ескертіп жатыр.
