Танымал вайнерлер соты: Мейіржан Төребаев өзінің әйелін қорғаушы ретінде тартуды сұрады

ERNUR.KZ. Алматыда Mudarabah Capital қаржы пирамидасына қатысты істің алдын ала тыңдау барысында айыпталушылар мен олардың қорғаушылары соттан үйқамақ түріндегі бұлтартпау шарасын өзгертуді, ал кейбіреулері өздеріне қатысты қылмыстық істі тоқтатуды сұрады, деп жазады ҚазАқпарат.

Сот отырысына 12 айыпталушы қатысты, оған судья Кәмшат Саурова төрағалық етті.

Кездесуде сотталушылардың адвокаттары судьядан барлық жәбірленушілерді онлайн шақыру мүмкін болмағандықтан, келесі кездесулерді оффлайн режиміне көшіруді сұрады.

Сот барысында «Astex» ЖШС басшысы А.К., айыптау актісімен келіспей, соттан бұлтартпау шарасын үйқамаққа өзгертуді және істі қайта қарауды сұрады. Ол қатерлі ісікке шалдықанын және кәмелетке толмаған үш бала тәрбиелеп отырғанын алға тартты. Сонымен қатар, сотқа дейінгі тергеу барысында оның компаниясы жәбірленушілерге 300 миллион теңгеден астам ақша төлеген. Оның айтуынша, ол әрбір инвестормен жеке кездесіп, мәселені бейбіт жолмен шешуге дайын.

Ал «Mudarabah Capital» компаниясының директоры Б. есімді сотталушы негізгі қатысушылар жауапқа тартылмады деп есептейді, сондықтан ол судьядан «Astex KZ» ЖШС мен «Қазақстанның Тендер биржасының» басшылары А.Қ және Ш.Қ, сонымен қатар, Д.Р есімді әйелді жауапқа тартуды сұрады. Сондай-ақ салымшылардан кешірім сұрады.

«Мен осы компанияның директоры ретінде Mudarabah Capital клиенттерінен кешірім сұрағым келеді. Біз барлық ақшаны қайтарамыз. Мен сіздерге уәде бердім. Кішкене күте тұрыңыздар. Қазір менің қолым байлаулы. Бірақ көп ұзамай ақшаларыңызды аласыздар», – деп уәде берді.

Сот отырысында Мейірхан Шерниязовтың да қорғаушысы сөз алды.

«Қылмыстық іс материалдарымен таныса келе, біз өз клиенттеріміздің әрекеттерінде қылмыс құрамының белгілері жоқ деген қорытындыға келдік. Мейірхан Шерниязовтың ісі бойынша жиналған материалдардың барлығы, керісінше, оның кінәсіздігін айғақтайды. Шерниязовқа тағылған айып тек оның «Mudarabah Capital» ЖШС-нің құрылтайшысы және жарнама үшін ақшалай өтемақы алу фактісіне негізделген. Мұндай сыйақы алу құқығы ЖШС жарғысында қарастырылған», - дейді ол.

Қорғаушылардың пікірінше, тергеу заң бұзушылықтармен жалғасқан. Олар соттан өз клиенттеріне қатысты қылмыстық істі тоқтатып, жәбірленуші деп тануды сұрады. Шерниязовтың өзі де адвокаттарын қолдады.

Мейіржан Төребаевтың өзі әйелін қорғаушы ретінде тартуды сұраған. Ол сондай-ақ істі прокурорға қайтару туралы өтініш берді, өйткені сотталушының айтуынша, тергеу заң бұзушылықтармен жүріп жатыр.

Оның қорғаушысы соттан Мейіржан Төребаевқа қатысты бұлтартпау шарасын үйқамаққа өзгертуді сұрады. Ол кәмелетке толмаған төрт баласы бар екенін және бұрын қылмыстық жауапкершілікке тартылмағанын айтты.

Айта кетейік, 12 желтоқсанда қаржы пирамидасын құрды деп айыпталған танымал вайнерлердің ісі сотқа жолданған болатын.

Қаржы пирамидасы ісі бойынша, А. Ораз пен А. Саидбаевқа халықаралық іздеу жарияланған. Қадағалау органының мәліметінше, қылмыстық істің негізінде 41 жылжымайтын мүлікке, 3 автокөлікке, 9 банк шотына және 16 компанияның жарғылық капиталындағы әртүрлі үлестерге тыйым салынды. Еске салайық, Алматы қалалық полиция департаментінің тергеу басқармасы танымал вайнерлер Мейіржан Төребаев пен Мейірхан Шерниязовқа ҚР Қылмыстық кодексінің 217-бабы 3-бөлігі бойынша айып тақты.

Кейіннен Мейіржан Төребаев пен Мейірхан Шерниязов ұсталды.