Жетісу облысында автобус аударылып, бір адам мерт болды

ERNUR.KZ. Жетісу облысында Зайсан-Алматы бағытында келе жатқан жолаушылар автобусы аударылып, бір адам мерт болды, деп жазады inform.kz.

Тағы үш адам түрлі дене жарақатымен ауруханаға түсті, деп хабарлайды ҚазАқпарат тілшісі. Облыстық полиция департаменті баспасөз қызметінің мәліметінше, көлік апаты Алматы-Өскемен тас жолының 396-шақырымында болған.

«Маусымның 11-інен 12-сіне қараған түні Ақсу ауданы Тарас ауылының маңында жолаушылар автобусы аударылды. Алдын ала болжам бойынша, «Setra» автобусының 50 жастағы жүргізушісі рөлге ие бола алмай қалған. Көлік Зайсан қаласынан Алматыға қарай келе жатқан. Оқиға орнында 66 жастағы әйел мерт болды, тағы үш адам зардап шегіп, ауруханаға түсті. Жарақат алғандардың ішінде 7 жастағы қыз бала бар», - делінген департаменттің баспасөз қызметі таратқан хабарламада.

Ведомствоның ақпаратына сәйкес, қазір аталған жол-көлік оқиғасы бойынша ҚР ҚК 345-бабы 3-тармағына сәйкес тергеу жүріп жатыр. Сараптамалар тағайындалған.