Жұмысын тоқтатқан күзет ұйымдары қару-жарағын полицияға тапсыруға міндеттеледі

ERNUR.KZ. Парламент Мәжілісі «Кейбір заңнамалық актілерге күзет қызметі мәселелері бойынша өзгерістер енгізу туралы» заң жобасын бірінші оқылымда мақұлдады, деп жазады azattyq-ruhy.kz.

Мәжіліс депутаты, AMANAT партиясы фракциясының мүшесі Жарқынбек Амантайұлының айтуынша, заң жобасына қару иелері мен күзет қызметін жүзеге асыратын ұйымдарға қойылатын талаптарды күшейтуге бағытталған нормалар енгізілген.

«Қару иелері үшін жаңа міндеттер енгізіліп отыр. Енді қару иелері – заңды тұлғалар өз қызметін тоқтата тұрған жағдайда 15 жұмыс күннің ішінде қару мен оның патрондарын ішкі істер органдарына сақтауға тапсыруға міндетті болады. Жеке күзет ұйымдары қызметтік қару мен арнаулы құралдарды сатып алуға құқығы бар, жарғылық міндеттері ерекше кәсіпкерлік субъектілері болып табылады. Сонымен қатар, азаматтық және қызметтік қаруды пайдаланушыларға атыс даярлығы бойынша практикалық сабақтар жүргізетін мамандандырылған оқу орталықтарының да атыс қаруын, оның ішінде ойық ұңғылы қару сатып алуға құқығы бар. Осылайша, бұл норма қаруды қылмыстық мақсатта пайдаланбау және ұлттық қауіпсіздікке төнетін қатерді болғызбау үшін енгізіледі», - деді ол Мәжілістің жалпы отырысында.

Сондай-ақ күзет қызметін жүзеге асыру тәртібі жаңа талаппен толықтырылған. Жеке күзет ұйымдары өз қызметін тоқтата тұрған, тоқтатқан немесе қайта бастаған жағдайда, сондай-ақ күзет қызметтерін заңды тұлға тіркелген жерден тыс жерде көрсеткен жағдайда уәкілетті органды 5 жұмыс күні ішінде хабардар етуге міндетті.

«Бұл норма заңды тұлға ретінде тіркеліп, бір өңірде лицензия алғаннан кейін басқа өңірде жұмыс істейтін күзет ұйымдарына қатысты мемлекеттік бақылауды күшейтуге де мүмкіндік береді. Осылайша, бұл бақылау субъектілерінің бақылаушы органның назарында болуын қамтамасыз етеді», - деп санайды Жарқынбек Амантайұлы.

Бұдан бөлек, күзет қызметтерінің тізбесіне «күзетілетін объектіде өткізу режимін қамтамасыз ету жөніндегі» жаңа қызмет қосылады.

Ішкі істер министрінің орынбасары Игорь Лепеханың айтуынша, қазір елімізде 4 200 күзет ұйымы тіркелген, соның ішінде 1600-1800 күзет ұйымы уақытша жұмыс істемейді. Ал күзетшілердің саны 95 мыңды құрап отыр.