Оларды тамашалау уақыты шектеулі, бірақ әсері мәңгілік
Мұздан жасалған ғимараттар мен ескерткіштер –табиғаттың ғажайып элементтері мен адамзаттың шығармашылық қабілетінің үйлесімі. Мұзды қонақүйлер, мүсіндер кешені, фестиваль аймақтары және басқа да ерекше орындар еріксіз елітіп, ертегі әлеміне жетелейді. Мұндай құрылымдарды қыс мезгілінде ғана тұрғызу мүмкіндігі бар. Онда да мерзімі шектеулі. Сол аз уақыттың ішінде адамдардың қызығушылығын оятып, тамашасымен тамсандырып үлгереді. Ал қазір осындай сұлулықты сурет арқылы тамашалау мүмкіндігін ұсынамыз.
1. Jukkasjärvi Ice Hotel (Швеция)
Әлемдегі ең танымал мұз қонақүйі – Швециядағы Jukkasjärvi Ice Hotel. Бұл қонақүй Лапландияда орналасқан және әр қыста жаңадан тұрғызылады. Сәйкесінше, әр жылы әр түрлі, қайталанбас дизайнда жасақталады. Қонақүйдің барлық бөлмелері, төсек орындары мен жиһаздары мұздан жасалған. Қонақүйдің ішіндегі түрлі-түсті шамдармен жарықтандыру жүйесі ерекше әсер қалдырады. Өйткені түрлі-түсті жарықпен шағылысқан мұз кесектері сан алуан бояуға көмкеріліп, мың құбылады.
2. Харбиндегі мұз фестивалі (Қытай)
Қытайдың Харбин қаласында жыл сайын мұздан жасалған ерекше мүсіндер мен ғимараттар фестивалі өтеді. Бұл фестиваль әлемдегі ең үлкен мұз фестивалінің бірі болып табылады. Мұнда мұздан тұрғызылған сарайлар, көпірлер, мұнаралар және жарықтандырылған мүсіндер көрмесі ұйымдастырылады. Сондай-ақ, келушілердің сырғанауына арналған мұзды көшелер мен төмпешіктер де болады.
3. Snow Village (Финляндия)
Финляндиядағы Snow Village – мұз бен қардан жасалған кішкентай қала. Мұнда мұз қонақүйлері, мейрамханалар және мұз шіркеуі орналасқан. Әсіресе, шіркеу туристер арасында танымал, себебі онда қысқы үйлену тойларын өткізуге болады.
Сыртын ақ қар басып, ішінде көк мұз сірескен Кеми қамалы да осы елде. Қамалдың ұзындығы бір шақырымға жуық болса, мұнараларының биіктігі 20 метрге жетеді.
4. Chena Hot Springs Ice Museum (Аляска, АҚШ)
Аляскадағы мұз мұражайы – әлемдегі жыл бойы ашық тұратын мұздан жасалған ғимараттардың бірі. Мұражайда мұз мүсіндері, люстралар және мұздан жасалған бар орналасқан. Мұнда келушілер арнайы мұз стакандардан сусын ішіп, нағыз мұз атмосферасын сезіне алады.
5. Balea Lake Ice Hotel (Румыния)
Карпат тауларында орналасқан Balea Lake Ice Hotel мұз бен қардан жасалған. Бұл қонақүй таудың таза ауасын тамашалау мен ерекше тәжірибе іздеген саяхатшыларға арналған. Әр қыста қонақүй жаңа тақырыпта безендіріліп, туристерді таңғалдырады.
6. Ice Castles (АҚШ және Канада)
Солтүстік Америкадағы Ice Castles жобасы – мұздан салынған ғажайып қамалдар мен туннельдер сериясы. Бұл уақытша құрылымдар жыл сайын бірнеше жерде қайтадан тұрғызылады. Жарықтандырылған мұз туннельдері мен жартас пейзаждары кешкі уақытта өте әсерлі көрінеді.
Ал, Канададағы Квебек қаласында жыл сайын қысқы карнавал өткізіледі. Карнавал кезінде қала алаңқайларында мұзды қалашықтар бой көтерсе, көше бойларында үлкен мұз мүсіндер менмұндалайды.
7. Киров мұз үңгірлері (Ресей)
Ресейдің Киров облысында мұз үңгірлері орналасқан. Бұл үңгірлердің ішіндегі мұз сталактиттері мен сталагмиттері табиғи жолмен қалыптасқан. Туристер мұнда ерекше мұз түзілістерін тамашалап, табиғаттың сұлулығын сезіне алады.
8. Ержеп жазығы (Исландия)
Исландияда мұздан жасалған көптеген табиғи ғимараттарды көруге болады. Айсбергтер, мұзды үңгірлер мен мұздықтар бұл өңірді табиғат әуесқойлары үшін ерекше етеді. Ең танымал жерлердің бірі – Ватнайекюдль мұздығының астындағы көгілдір мұз үңгірлері.
9. Финляндияның мұзды шіркеуі (Финляндия)
Финляндиядағы мұзды шіркеу де әлемге әйгілі орындардың бірі болып табылады. Бұл шіркеу жыл сайын қар мен мұздан қайта салынатындықтан, әр жаңа құрылыс өзіндік ерекшеліктерге ие. Қысқы айларда мұнда үйлену тойлары мен басқа да маңызды рәсімдер өткізіледі.
10. Мұзды музей, Зальцбург (Австрия)
Австрияның Зальцбург қаласындағы Мұзды музей – өте ерекше мұз ғимараты. Бұл жерде мұздан жасалған әртүрлі өнер туындылары мен мүсіндер көрмесі ұйымдастырылады. Туристер бұл жерде салқындап, мұздың ғажайып әлеміне еніп, әртүрлі экспонаттарды тамашалай алады.
11. Мұзды қонақүй - Киркябайгар (Исландия)
Исландияның мұзды қонақүйі Киркябайгар – әлемдегі ең ерекше қонақүйлердің бірі. Мұнда барлық бөлмелер мұздан жасалған, ал ішкі кеңістіктерінің дизайны мен жиһаздары ерекше мұзды тақырыптармен безендірілген. Мұнда тыныш әрі салқын атмосферада демалуға болады.
12. Мұзды мейрамхана (Дубай, БАӘ)
Дубайдағы «Chillout Ice Cafe» – Таяу Шығыстағы алғашқы мұзды мейрамхана. Мұнда қабырғалардан бастап, жиһаздар мен шыныаяқтарға дейін бәрі мұздан жасалған. Мейрамхана барында сусын ішкіңіз келсе, мұзды оырндықтардан орын ұсынып, сусынды мұздан жасалған стаканға құйып береді.
Мұздан жасалған ғимараттар мен жерлер әлемнің әр түкпірінде кездеседі және олардың әрқайсысы өзіндік ерекше сұлулыққа ие. Мұндай құрылымдар табиғаттың күшін, адамның шығармашылығын және инновацияларын көрсетеді. Егер ерекше әрі ұмытылмас саяхат жасағыңыз келсе, мұздан жасалған ғажайыптарды көріп қайтуға тұрарлық.
Дайындаған: Б. ЕРМАН,
ТАҒЫ ДА ОҚЫҢЫЗ:
