Сенаторлар Шымкентке іс-сапармен келді

04.07.2022 15:43

828

Халық қалаулылары Б.Әлтаев бастаған Қоғамдық кеңес мүшелерімен өткен кездесуде өңірдегі өзекті мәселелер қаралды.

ҚР Парламенті Сенатының депутаттары Н.Бекназаров пен А.Қапбарова Шымкентке іс-сапармен келді, деп хабарлайды ERNUR.KZ.

Кездесу барысында азық-түлік бағасын тұрақтандыру, субсидия жайы, жылдық бюджеттің жоспарға сай игерілуі, мемлекеттік қызметшілердің халыққа ашық болуы сынды бірқатар мәселелер талқыланды. Қоғамдық кеңес өкілдері өңірдегі жағдайды баяндап, алдағы атқарылатын жұмыс барысын атап өтті. Сонымен қатар, күні кеше құрылған Құрылтайдың жұмысы да назардан тыс қалмады.

Жиын соңында сенаторлар өңірдің даму жоспарына қатысты негізгі мәселелерді назарда ұстайтынын айтып, Қоғамдық кеңес жұмысына сәттілік тіледі.

Айта кетейік, ҚР Парламенті Сенатының депутаты Ләззат Қалтаева қаладағы «Белсенді ұзақ өмір сүру орталығының» бүгінгі тыныс-тіршілігімен танысты. Қалалық жұмыспен қамту және әлеуметтік қорғау басқармасының «Белсенді ұзақ өмір сүру орталығының» жұмыс ауқымы кеңейген. Мұнда арнаулы әлеуметтік қызмет түрлерінің саны да артып келеді. 2019 жылы құрылған орталықта қазіргі таңда 500-ден астам зейнеткерге қызмет көрсетілуде. Сенат депутаты дәрігерлік тексеру (терапевт, невропатолог, физиотерапевт, психолог), еңбек, музыка, бейнелеу өнері (ART терапия), қыш өнері (ART ELAY), компьютерлік сауаттылық және тағы басқа бөлімдерді аралап көрді. Ләззат Молдабекқызы орталықтың жұмысын оң бағалап, қаладан мұндай әлеуметтік медициналық оңалту орталықтарын көптеп ашу қажеттігін атап өтті. Сауықтыру мекемесінде зейнеткерлерге күнделікті 2 ауысымда 4 сағаттық арнаулы әлеуметтік қызмет түрлері ұсынылады. Қарияларға қызмет көрсету үшін кардиолог, терапевт, невропатолог және физиотерапевт дәрігерлері жұмылдырылған. Сондай-ақ, зейнеткерлердің емдік дене шынықтырудан бастап йога, би, бильярд, үстел теннисімен шұғылдануға мүмкіндігі бар.