Шымкент қаласында кезекші сыныптарға шахмат сабағы енгізіледі

Биылғы оқу жылы қаладағы 178 мектепте 224 618 оқушы білім алуда. Бұл өткен жылмен салыстырғанда 12 000 балаға артық. Оның ішінде 1-сыныпқа 24 490 бала электронды форматта қабылданды, деп хабарлайды ERNUR.KZ.

1-4 сыныптар аралығында оқушылардың 22% арнайы ашылған кезекші сыныпта мектепке келіп білім алса, қалған 78% оқушы онлайн оқуда.

– Қаладағы барлық мектептерде «Bilim Iand - Onlinemektep.org» интернет платформасында қашықтан оқыту ұйымдастырылған. Сонымен қатар, олар ҚР БҒМ тарапынан ендірілген «Күнделік.кз» электронды журналдар ақпараттық жүйесінде жұмыс жүргізуде. Ал мектепке дейінгі ұйымдарда ата-аналардың қалауы бойынша балаларды кезекші топтарға қабылдау ұйымдастырылды. Бала саны 15-тен аспайды. Жалпы, бүгінде 2711 кезекші топта 18 971 бала тәрбиеленуде, – деп мәлімдеді Шымкент қалалық Білім басқармасының басшысы Жанат Тәжиева.

Білім мекемелері толығымен интернет желісіне қосылған. Қазіргі таңда «Қазақтелеком» АҚ арқылы білім ұйымдарының интернет желісінің жылдамдығын 8 Мб/с - 12 Мб/с-қа дейін ұлғайту бойынша қосымша келісім шарттар түзілуде.

Шымкент қаласында кезекші сыныптарға шахмат сабағы еңгізіледі. Бұл бастама жөнінде пікір білдірген Жанат Арысбекқызы басты мақсат баланың зияткерлік деңгейін өсіру, ой-өрісін дамыту екенін алға тартты.